Jambyl oblysynda orman órtine kináli bes adam jaýapqa tartyldy
ASTANA. KAZINFORM – Jambyl oblysynda memlekettik orman qory aýmaǵynda bolǵan órtterge kináli bes adam ákimshilik jaýapkershilikke tartyldy. Olar aıyppul tóleýmen qatar tabıǵatqa keltirilgen shyǵyndy da tolyq ótedi.
Óńirde órt qaýpi joǵary maýsym 26 naýryzda bastaldy. Osy ýaqyt ishinde memlekettik orman qorynyń 363,85 gektar aýmaǵyn jalyn sharpydy. Shilde aıynyń sońyna deıin barlyǵy 15 orman órti tirkelgen.
Tabıǵı resýrstar jáne tabıǵat paıdalanýdy retteý basqarmasy basshysynyń orynbasary Medet Úristenovtiń aıtýynsha, bes jaǵdaıda órttiń shyǵýyna sebep bolǵan adamdar anyqtalǵan.
– Olarǵa jalpy somasy 216,3 myń teńge kóleminde aıyppul salyndy. Sonymen qatar qorshaǵan ortaǵa keltirilgen 83,9 myń teńge zalal tolyq óndirildi, – dedi ol.
Aýmaqtyq ınspektsııa árbir órt boıynsha keltirilgen shyǵyndy jeke eseptegen. Barlyq 15 órtten kelgen tikeleı jáne janama zalaldyń jalpy kólemi 613,7 myń teńgeni qurady. Onyń 34,4 myń teńgesi – tikeleı shyǵyn, al 579,3 myń teńgesi – janama shyǵyn.
Órtke kináli dep tanylǵan bes adam – jaýapqa tartylǵandardyń bir bóligi ǵana. Inspektsııa memlekettik orman qoryndaǵy órt qaýipsizdigi talaptaryn buzǵan, biraq órt týyndamaǵan ózge de quqyq buzýshylyqtardy esepke alady.
Osyndaı derekter boıynsha 109 adamǵa ákimshilik hattama toltyrylyp, olarǵa jalpy somasy 3,1 mln teńgeden astam aıyppul salyndy.
Jaýapkershilik orman sharýashylyǵy qyzmetkerlerine de júkteldi. Jeti laýazymdy tulǵa ákimshilik jaýapkershilikke tartylsa, taǵy eki qyzmetkerge tártiptik jaza qoldanyldy.
Jambyl oblysyndaǵy memlekettik orman qorynyń aýmaǵy 4,4 mıllıon gektardan asady. Bul – óńir jeriniń shamamen úshten biri.
Órtti erte anyqtaý úshin orman alqaptarynda táýlik boıy jumys isteıtin 65 baqylaý beketi men 41 órt baqylaý munarasy qyzmet kórsetedi. Sonymen qatar orman jaǵdaıy 17 ushqyshsyz ushý apparatynyń kómegimen baqylanady.
Aıta keteıik, búgin respýblıka aýmaǵyndaǵy orman qorynda 5 órt tirkeldi.
