Jambyl oblysynda óńirlik aýqymdaǵy tótenshe jaǵdaı jarııalandy

Jambyl oboysynda respýblıkalyq mańyzy bar avtojoldar jabyldy, dep habarlaıdy Kazinform.

Aýa raıynyń kúrt nasharlaýyna (temperatýranyń tómendeýi, qarly boran, kórýdiń nasharlyǵy) baılanysty 12 jeltoqsannan bastap respýblıkalyq mańyzy bar «Batys Eýropa-Batys Qytaı» avtobanynyń «Taraz-Almaty» baǵyty boıynsha jáne oblystyq mańyzy bar birqatar joldarda kólik qozǵalysy toqtatyldy.

Jambyl oblysy ákiminiń tapsyrmasymen 13 jeltoqsannan bastap óńirlik jedel shtab qurylyp, jumystar júrgizýde.

Oblystyq baspasóz qyzmetiniń bergen málimetterine súıensek, qutqarý jumystaryna 117 arnaıy tehnıka, 103 adam (TJD, áskerı qyzmetshiler) jumyldyrylǵan.

14 jeltoqsan kúni saǵat 23.00-degi jaǵdaı boıynsha qutqarý bólimshelerimen 1279 adam qutqarylyp, evakýatsııalandy. Olar Qordaı aýdanyndaǵy 6 jylytý pýnktine ornalastyryldy.
Áli de qar qursaýynda qalyp otyrǵan kólikterdiń sany naqtylanýda.

Qatty jel men qardyń saldarynan Shý aýdanynda elektr jelileri úzilip, tirek tirekteri qulady.
Tótenshe jaǵdaı saldarynan «Shý Otar» ýchaskesinde 11 jolaýshylar poıyzy toqtap tur, olardyń árqaısysynda ortasha eseppen 500-700 adamnan bar. 12 júk poıyzy óz ýaqytynan keshigýde.

Oblystyń 4 aýdanynyń 32 eldi mekeninde 8 882 abonent elektr qýatynan ajyratylǵan.
Qazirgi kezde jeldiń jyldamdyǵy sekýndyna 45 metrge deıin jetýde.

Aldaǵy kúnderi «Qazgıdromet» RMK boljamyna sáıkes, 30 m/s qatty jel uıytqýy saqtalady.
Qalyptasqan jaǵdaıǵa baılanysty oblys boıynsha qaýyrt jeli nómirleri iske qosyldy.