Jambyl oblysynda onkologııamen aýyratyn naýqastarǵa múgedektik statýsy berilmegeni anyqtaldy
ASTANA. KAZINFORM – Taraz qalasynyń prokýratýrasy múmkindigi shekteýli adamdardyń quqyqtaryn qorǵaý salasyndaǵy zańnamanyń saqtalýyna taldaý júrgizdi.
Nátıjesinde 2020 jyldan 2025 jyldyń shildesine deıin Jambyl oblystyq kóp beıindi onkologııa jáne hırýrgııa ortalyǵynda III jáne IV satydaǵy aýrý boıynsha esepte turǵan 49 qala turǵynynyń quqyǵy buzylǵany anyqtaldy.
Atap aıtqanda, onkologııamen aýyratyn naýqastar múgedektik tobyn anyqtaý úshin medıtsınalyq-áleýmettik saraptamaǵa jiberilmegen, bul olardyń múgedektik resimdeý jáne tıisti memlekettik áleýmettik tólemder men járdemaqylar alý múmkindiginen aıyrǵan.
– Prokýratýranyń qadaǵalaý aktisi boıynsha 49 adam medıtsınalyq-áleýmettik saraptamaǵa jiberilip, nátıjesinde bıylǵy qazan aıynan bastap olarǵa I-den III topqa deıin múgedektik taǵaıyndalyp, keıinnen memlekettik qoldaý alýǵa múmkindik berildi, - delingen Jambyl oblysynyń prokýratýrasy habarlamasynda.
Jol berilgen zańbuzýshylyqtar úshin 5 dárigerlik-konsýltatsııalyq komıssııa tóraǵasy túrli tártiptik jaýapkershilikke tartyldy.
Aıta keteıik, elimizde jasandy ıntellektiniń kómegine júginip múgedektikti anyqtamaq. Odan bólek ataýly áleýmettik kómekti de (AÁK) jasandy ıntellekt arqyly taǵaıyndamaq. Jańashyldyq týraly tolyǵyraq Eńbek jáne halyqty áleýmettik qorǵaý vıtse-mınıstri Oljas Anafın aıtyp berdi.