Jambyl oblysynda oqýshylar býllıngine qatysy bar úsh ata-anaǵa aıyppul salyndy

ASTANA. KAZINFORM — Jambyl oblysynyń Moıynqum aýdanynda oqýshylar óz qatarlastaryn qorqytyp, túrli jumystardy isteýge májbúrlegen, dep habarlaıdy Kazinform tilshisi.

Moıynqum aýdandyq soty Qazaqstan Respýblıkasynyń Ákimshilik quqyq buzýshylyq týraly kodeksiniń 127-2-babynyń 1-bóligi (kámeletke tolmaǵandy qorqytý, ıaǵnı býllıng, kıberbýllıng) boıynsha úsh ákimshilik quqyq buzýshylyq isin qarady.

Ótken jyldyń jeltoqsan aıynda Moıynqum aýdanynyń Jambyl aýylynda jergilikti orta mekteptiń úsh jasóspirim oqýshysy basqa oqýshylarǵa júıeli túrde qysym kórsetken. Іs materıaldaryna sáıkes, jasóspirimder óz qatarlastaryn túrli jumystardy istetkizgen. Bul áreketter býllıng, onyń ishinde kıberbýllıng elementteri bar quqyq buzýshylyq retinde saralanǵan.

Quqyq buzýshylardyń kinási ákimshilik quqyq buzýshylyq týraly hattamalarmen, oqıǵa týraly habarlamalarmen, jábirlenýshiler ókilderiniń jazbasha aryzdarymen jáne túsiniktemelerimen dáleldendi.

Sot otyrysynda úsh balanyń ata-anasy kinálaryn moıyndap, keshirim surady jáne mundaı jaǵdaıdyń endi qaıtalanbaıtynyn aıtty. Jábirlenýshilerdiń ata-analary da istiń mán-jaıyn rastady jáne kinálilerdi jaýapkershilikke tartýdy surady.

Sot úsh jasóspirimniń ata-anasyna da 10 aılyq eseptik kórsetkish (bıylǵy AEK boıynsha 43 250 teńge) mólsherinde aıyppul taǵaıyndady.

Sot úkimi zańdy kúshine endi.

Aıta keteıik, Jambyl oblysynda perzenthanadaǵy ana ólimine baılanysty jospardan tys tekserý bastaldy.