Jambyl oblysynda nashaqor narkologııalyq dıspanserge bomba qoıylǵanyn habarlady

TARAZ. KAZINFORM - Narkologııalyq dıspanserde bomba týraly jalǵan habar bergen adam ustaldy, – dep habarlaıdy Polisia.kz.

8 sáýirde saǵat 16.00 shamasynda Merki aýdandyq polıtsııa bóliminiń 102 pýltine Jambyl oblystyq narkologııalyq dıspanserinde jarylǵysh qurylǵynyń ornatylǵany týraly qońyraý kelip tústi. Tekserý barysynda bul aqparat rastalmady. Ekstremızmge qarsy is-qımyl bólinisiniń qyzmetkerleri júrgizgen jedel-izdestirý is-sharalarynyń nátıjesinde osy aýdannyń 20 jastaǵy turǵyny ustaldy. Ol esirtkige mas kúıde qońyraý shalǵanyn moıyndady.

Ustalǵan adam buryn esirtki saqtaǵany úshin sottalǵan jáne esirtkige táýeldi retinde esepte turǵan. Ótken jyly joǵaryda atalǵan narkologııalyq dıspanserde májbúrli túrde statsıonarlyq emdeýden ótken. Qazirgi ýaqytta terrorızm aktisi týraly kórineý jalǵan habarlaǵany úshin qylmystyq is qozǵaldy, kúdikti ýaqytsha ustaý ızolıatoryna qamaldy.

Іshki ister mınıstrligi Qylmystyq kodekstegi osy qylmys úshin 5 myń AEK (bul 18 mln teńgeden astam) mólsherinde aıyppul ne bolmasa bes jylǵa deıin bas bostandyǵyn shekteý nemese bas bostandyǵynan aıyrý jazasy kózdeletinin taǵy da eske salady.

Sonymen qatar sot sheshimi boıynsha kináli adam «jalǵan terrorızm» aktisi saldarynan jeke jáne zańdy tulǵalarǵa keltirilgen zalaldy óteýge májbúr bolady.