Jambyl oblysynda múmkindigi shekteýli ár tórtinshi bala bilim almaı otyr
TARAZ. KAZINFORM – Jambyl oblysynda ınklıýzıvti bilim berý júıesi damyp kele jatqanyna qaramastan, erekshe bilim berý qajettilikteri bar balalardyń eleýli bóligi áli de oqý úderisinen tys qalyp otyr, dep habarlaıdy Kazinform tilshisi.
Óńirde erekshe bilim berý qajettilikteri bar 10 073 bala tirkelgen, olardyń 76,7%-y ǵana bilim alýda. Osylaısha, shamamen ár tórtinshi bala bilim berý júıesine tartylmaǵan.
Bilim basqarmasynyń málimetine súıensek, ınklıýzıvti bilim berý úshin jaǵdaı memlekettik mektepterdiń 95%-ynda, balabaqshalardyń 82,5%-ynda jáne barlyq kolledjderde jasalǵan. Soǵan qaramastan, naqty qamtý deńgeıi tolyq emes. Bul ınfraqurylymdyq jáne uıymdastyrýshylyq kedergilerdiń áli de bar ekenin kórsetedi.
Inklıýzıvti bilim berýdi damytý aıasynda sońǵy ýaqytta eki arnaıy mektep-ınternatqa kúrdeli jóndeý júrgizilip, olardyń materıaldyq-tehnıkalyq bazasy jańartylǵan. Sondaı-aq eki mektepte erekshe qajettiligi bar balalardy qoldaý kabınetteri ashylǵan, al bir balabaqshada kórý qabileti tómen balalarǵa arnalǵan arnaıy top qurylǵan.
Budan bólek, Taraz qalasynda psıhologııalyq-medıtsınalyq-pedagogıkalyq konsılıým jumysyn bastady. Aldaǵy ýaqytta osyndaı taǵy bir ortalyq ashý josparlanyp otyr.
Bilim basqarmasy ókilderiniń aıtýynsha, erekshe bilim berý qajettilikteri bar balalardy oqytýǵa qoljetimdilikti keńeıtý baǵytyndaǵy jumystar jalǵasyp kele jatyr.
Eske sala ketsek, Astanada erekshe bilim berýdi qajet etetin balalar sany artyp keledi.
Sondaı-aq byltyr erekshe bilim berý qajettilikteri bar balalarǵa arnalǵan alǵashqy qazaqtildi qosymsha tanystyryldy.
