Jambyl oblysynda memlekettik qyzmetkerlerge 735 myń teńgeden astam aıyppul salyndy
ASTANA. KAZINFORM — Jambyl oblysynda bıylǵy jyldyń alǵashqy alty aıynda sottar aqshalaı óndirip alý sharasyn jeti ret qoldandy. Bul ótken jyldyń sáıkes kezeńimen salystyrǵanda shamamen úsh esege az. Bul týraly Kazinform agenttiginiń tilshisi habarlady.
Aqshalaı óndirip alý sharalary ákimshilik rásimderdiń saqtalýy men sot talaptarynyń oryndalýyna jaýapty mekeme basshylaryna, memlekettik qyzmetshilerge jáne jeke sot oryndaýshylaryna qatysty qoldanylǵan.
Máselen, sottyń málimetinshe, mundaı sharalardyń biri «Azamattarǵa arnalǵan úkimet» memlekettik korporatsııasy fılıalynyń Shý aýdandyq tirkeý jáne jer kadastry bóliminiń basshysyna qatysty qabyldanǵan.
Jeti óndirip alý sharasynyń jalpy somasy 735 250 teńge bolǵan. Bul ótken jylmen salystyrǵanda aıtarlyqtaı tómen kórsetkish. 2025 jyldyń osy kezeńinde ákimshilik sottar 20 osyndaı uıǵarym shyǵaryp, jalpy 1 612 120 teńge kóleminde aqshalaı óndirip alý sharasyn qoldanǵan. Osylaısha, bıyl qabyldanǵan sharalardyń sany da, jalpy somasy da eki eseden astam qysqarǵan.
Budan bólek, sottar memlekettik organdar men sot oryndaýshylarynyń atyna 33 jeke uıǵarym shyǵardy. Oblystyq sottyń túsindirýinshe, bul sharalardyń maqsaty – sot aktileriniń oryndalýyn qamtamasyz etý jáne ákimshilik organdardyń jumysyndaǵy zańbuzýshylyqtardy joıý.
Eske sala keteıik, buǵan deıin Prokýratýra Jambyl oblysynda jetim balalarǵa tólem, kıim-keshek jáne joldama berilmegenin anyqtaǵan edi.
