Jambyl oblysynda memleketke qaıtarylǵan jer úshinshi adamnyń atyna zańsyz tirkelgen
ASTANA. KAZINFORM – Jambyl oblysynyń prokýrorlary memlekettik jer ýchaskesin zańsyz ıelikten shyǵarýdyń jolyn kesti.
Talas aýdany prokýratýrasy «Azamattarǵa arnalǵan úkimet» memlekettik korporatsııasynyń aýdandyq bóliminiń qyzmetine tekserý júrgizdi.
Tekserý barysynda zańdy kúshine engen sot aktisi negizinde memleket menshigine qaıtarylǵan jyljymaıtyn múlikke úshinshi tulǵanyń atyna jeke menshik quqyǵynyń zańsyz tirkelgeni anyqtaldy.
Atap aıtqanda, Jambyl oblysynyń mamandandyrylǵan aýdanaralyq ekonomıkalyq sotynyń 2024 jylǵy 30 mamyrdaǵy sheshimimen Qarataý qalasynda ornalasqan, aýdany 0,28 ga, naryqtyq quny 22 mln teńge bolatyn jer ýchaskesi memlekettik jer qoryna qaıtarylǵan.
Alaıda jergilikti atqarýshy organnyń birneshe ret júginýine qaramastan, ýákiletti organ — «Azamattarǵa arnalǵan úkimet» memlekettik korporatsııasy atalǵan jyljymaıtyn múlikti memleket menshigine tirkeý boıynsha tıisti sharalar qabyldamaǵan.
Oblystyq prokýratýra málimetinshe, sonyń saldarynan jer ýchaskesi burynǵy ıesiniń menshiginde qalyp, keıinnen úshinshi tulǵanyń atyna qaıta rásimdelgen.
Prokýrorlyq qadaǵalaý aktisi negizinde Qarataý qalasynyń ákimdigi satyp alý-satý shartyn jaramsyz dep taný týraly sotqa talap qoıýmen júgindi.
Aýdandyq sottyń sheshimimen talap qanaǵattandyryldy. 2026 jylǵy 19 aqpanda apellıatsııalyq saty birinshi satydaǵy sot sheshimin ózgerissiz qaldyrdy. Osylaısha, jer ýchaskesi memleket menshigine qaıtaryldy.
Sonymen qatar kináli tulǵalarǵa qatysty qazirgi ýaqytta sotqa deıingi tergep-tekserý júrgizilip jatyr.
Aıta keteıik, Almaty JEO-1 men JEO-2 arasyndaǵy jylý magıstrali úshin jerler memleketke ótedi.
