Jambyl oblysynda 47,5 myń gektar jer memleketke qaıtaryldy
ASTANA. KAZINFORM – Jambyl oblysynda bıyldan beri memleket menshigine 47 536,43 gektar aýyl sharýashylyǵy jeri qaıtaryldy, dep habarlaıdy Kazinform tilshisi.
Qaıtarylǵan jerdiń basym bóligin jaıylymdar quraıdy. Olardyń jalpy aýmaǵy 42 502,46 gektar. Budan bólek, memleket menshigine 2 969,05 gektar egistik jáne 2 064,93 gektar ózge sanattaǵy jer qaıtarylǵan.
Jambyl oblysynyń Jer resýrstaryn basqarý departamentiniń málimetinshe, bul jerler nysanaly maqsatyna saı paıdalanylmaǵan nemese zań talaptaryn buza otyryp ıgerilgen.
Bıyl óńirge 40 myń gektar aýyl sharýashylyǵy jerin memleketke qaıtarý jospary bekitilgen bolatyn. Mamandardyń aıtýynsha, jarty jyldyń ishinde bul jospar tolyq oryndalyp, belgilengen mejeden asyp tústi.
Departament ókilderi mundaı jerlerdi memleketke qaıtarýdyń aýyldyq eldi mekender úshin mańyzy zor ekenin atap ótti. Óıtkeni jaıylym tapshylyǵy turǵyndar men sharýalar jıi kóteretin máselelerdiń biri. Memleket qoryna qaıtarylǵan jerler keıin zańnamaǵa sáıkes qaıta aınalymǵa engizilýi múmkin.
Jerdi memlekettik baqylaý aıasynda óńirdegi aýyl sharýashylyǵy alqaptaryna tekserýler de júrgizildi. Sonyń nátıjesinde 6,57 gektar aýmaqta zańbuzýshylyqtar anyqtalyp, kináli tulǵalarǵa olardy joıý týraly nusqamalar berildi.
Aıta keteıik, buǵan deıin Túrkistan oblysynda quny 48 mln teńge bolatyn jer ýchaskeleri memleket menshigine qaıtarylǵany habarlandy.
