Jambyl oblysynda mekteptiń talyn kesken jumysshy kóz jumdy – Qylmystyq is qozǵaldy

TARAZ. KAZINFORM – Jambyl oblysynyń Baızaq aýdanynda 51 jastaǵy mektep jumysshysy aǵashtardy kesý kezinde qulap, oqıǵa ornynda kóz jumdy. Qaıǵyly oqıǵany oblystyq Bilim basqarmasy rastady.

Resmı habarlamada 2025 jylǵy 30 qańtarda Baızaq aýdany Dıhan aýylynyń tirek mektebinde tehnıkalyq qyzmetker sharýashylyq jumystaryn oryndaý kezinde jaraqat alǵany, sonyń saldarynan qaıtys bolǵany jazylǵan.

– Atalǵan fakti boıynsha qylmystyq is qozǵaldy. Oǵan qosa, ýákiletti organdar arnaıy tergeý júrgizip jatyr. Oǵan Memlekettik eńbek ınspektsııasy komıtetiniń óńirlik departamentiniń basshylyǵymen Baızaq aýdanynyń bilim bólimi ókilderi qatysyp jatyr, – dep habarlady vedomstvo.

Óz kezeginde Jaambyl oblystyq Polıtsııa departamenti 51 jastaǵy jumysshynyń qaza bolýyna baılanysty QR Qylmystyq kodeksiniń 156-babynyń 3-bóligi boıynsha qylmystyq is qozǵalǵanyn málimdedi.

Bul bapta eńbek qaýipsizdigi erejelerin uıymdastyrý nemese qamtamasyz etý mindeti júktelgen tulǵanyń zańbuzýshylyǵy, sonyń saldarynan abaısyzda adam ólimine ákelgeni úshin jaýapkershilik qarastyrylǵan.

Atalǵan bapqa sáıkes, kináli azamatty belgili bir laýazymdardy atqarý nemese belgili bir qyzmetpen aınalysý quqyǵynan 3 jylǵa deıin aıyryp nemese onsyz, 5 jylǵa deıin bas bostandyǵyn shekteý ne sol merzimge bas bostandyǵynan aıyrý jazasy berilýi múmkin.

Qazirgi ýaqytta sotqa deıingi tergeý aıasynda qajetti saraptamalar júrgizilýde.

Eske salsaq, ótken jyly Semeı qalasynyń muǵalimi ortalyq alańdaǵy jańajyldyq shyrshany bezendirý kezinde qulap, jaraqat alǵan edi.

Densaýlyǵyna zaqym kelýine baılanysty muǵalimge ýaqytsha eńbekke jaramsyzdyq paraǵy negizinde ortasha eńbekaqysy tólenip otyrmaq.