Jambyl oblysynda medıtsına qyzmetkerine til tıgizgen er adamǵa aıyppul salyndy

ASTANA. KAZINFORM — Medıtsına qyzmetkerine mas kúıinde tıisken er adam tek balaǵattap qoımaı, ony medıtsınalyq zattar salynǵan sómkemen urǵan.

Jýaly aýdanynyń turǵyny meıramhanadaǵy keshten keıin oqys jaǵdaıǵa tap bolyp, úıine jedel járdem shaqyrady. Ol alǵashqy kómek kórsetýge kelgen qyzmetkerlerge ádepsiz sózder aıtyp, óreskel qylyqtar kórsete bastaıdy. Kórsetilgen kómekke kóńili kónshimegen er adam feldsherdi dári-dármek pen quraldar salynǵan medıtsınalyq qobdıshamen urǵan. Naýqastyń agressııasynan shoshyp ketken medıtsına qyzmetkeri dereý polıtsııa shaqyrǵan.

Nátıjesinde, agressıvti azamat QR Ákimshilik quqyq buzýshylyq týraly kodeksniń 80-1-babynyń 2-bóligimen kináli dep tanyldy. Mundaı quqyq buzýshylyq úshin 30 aılyq eseptik kórsetkish (2025 jyly 117 900 teńge) kóleminde aıyppul salyný nemese 10 táýlikke deıin ákimshilik qamaýǵa alý jazasy taǵaıyndalady.

Sot shý shyǵarǵan turǵynnyń shyn ókinip, kinásin moıyndaǵanyn baǵalap, aıyppuldy 30 paıyzǵa azaıtty. Ol dórekilik úshin endi 82 000 teńge tóleıdi.

Eske salaıyq, Prezıdent medıtsına qyzmetkerlerine kúsh kórsetkeni úshin jazany kúsheıtýdi tapsyrdy.