Jambyl oblysynda mas kúıdegi azamat qolyn qaıtarǵan kórshisine pyshaq suǵyp alǵan

TARAZ. KAZINFORM — Jambyl oblysynda mas kúıdegi er adam kórshisinen qurylys quraldaryn surap, odan bas tartqan soń kórshisine pyshaq suǵyp alǵan, dep habarlaıdy Kazinform agenttiginiń óńirdegi menshikti tilshisi.

Shýǵa aýdandyq sotynyń baspasóz qyzmeti habarlaǵandaı, oqıǵa qyrkúıek aıynda Tóle bı aýylynda bolǵan. Іs materıaldaryna sáıkes, sottalýshy kórshisine baryp, qurylys quraldaryn ýaqytsha berýin suraǵan. Alaıda kórshisi bas tartqannan keıin ekeýiniń arasynda janjal shyǵyp, sońy tóbeleske ulasqan.

Qaqtyǵys kezinde sottalýshy ústel ústinde jatqan pyshaqty alyp, kórshisiniń ishine bir ret suqqan. Jaraqat alǵan er adam aýrýhanaǵa jetkizilgen.

Sottalýshy óz kinásin tolyq moıyndap, istegen isine ókinetinin jetkizdi. Onyń áreketi Qazaqstan Respýblıkasynyń Qylmystyq kodeksiniń 106-baby 1-bóligi («Densaýlyqqa qasaqana aýyr zııan keltirý») boıynsha saralandy. Bul bap boıynsha 3 jyldan 8 jylǵa deıin bas bostandyǵynan aıyrý jazasy qarastyrylǵan.

Sot aıyptalýshynyń kinásin moıyndaǵanyn, ókingenin jáne taraptardyń tatýlasqanyn eskerdi. Jábirlenýshi sotqa aıyptalýshyǵa shaǵymy joq ekenin málimdedi. Al qylmysty alkogoldik mas kúıinde jasaý — jazany aýyrlatatyn mán-jaı retinde tanyldy.

Sot er adamdy úsh jylǵa bas bostandyǵynan aıyrý jazasyn shartty túrde óteýge úkim shyǵardy.

Aıta keteıik, Jambyl oblysynda janjal kezinde jaraqat alǵan oqýshyny úıine jetkizgenimen, jedel járdem kelgenshe kóz jumǵanyn habarlaǵanbyz.