Jambyl oblysynda mamandar daıarlaýǵa bólingen 25,5 mln teńgeni jymqyryp qoıǵan

ASTANA. KAZINFORM – Jambyl oblysynyń prokýratýrasy tehnıkalyq jáne kásiptik bilim berý mamandaryn daıarlaýǵa arnalǵan 25,5 mln teńge qarajat jymqyrý faktisin anyqtady. 

— Jambyl oblysy ákimdigi Bilim basqarmasynyń «Túzetý mekemesi janyndaǵy № 15 kolledj» basshylyǵy oqýǵa is júzinde qatyspaǵan sottalǵandarǵa bilim bergeni úshin 3 jyl kóleminde qarjylandyrýdy zańsyz alǵany belgili boldy. 2025 jylǵy 5 aqpanda oblys prokýratýrasy Qylmystyq kodekstiń 189-baby 4-bóliginiń 2)-tarmaǵy boıynsha sotqa deıingi tergep-tekserýdi bastady (senip tapsyrylǵan bóten múlikti ıemdenip alý nemese talan-tarajǵa salý), — delingen Jambyl oblysynyń prokýratýrasy habarlamasynda.

Tergeý júrgizý Jambyl oblysy boıynsha Ekonomıkalyq tergep-tekserý departamentine tapsyryldy.

Qylmystyq-protsestik kodekstiń 201-babyna sáıkes tergeý múddesi úshin ózge aqparat jarııa etýge jatpaıdy.

Aıta ketelik Túrkistan oblysynda bilim salasynyń qyzmetkerleri 547 mıllıon teńgeden astam qarjy jymqyrdy degen aıyppen sottalǵan edi.