Jambyl oblysynda qutqarýshylar qar qursaýynda qalǵan 15 kólikti shyǵardy

TARAZ. KAZINFORM – Jambyl oblysynda aýa raıynyń kúrt nasharlaýyna baılanysty avtojoldarda avarııalyq-qutqarý jumystary jalǵasýda. Óńirde qar qursaýynda qalǵan birqatar kólikke kómek kórsetildi.

TJM málimetinshe, Talas aýdanyndaǵy «Taraz – Qarataý» avtojolynda joldyń júrý bóliginde turyp qalǵan 10 jeńil avtokólik qutqarýshylardyń kúshimen qaýipsiz ýchaskelerge súıretilip shyǵaryldy.

Sonymen qatar Jýaly aýdanynda «Taraz – Shymkent» avtojolynyń Shaqpaq ata aýyly mańynda qar qursaýynda qalǵan taǵy eki jeńil avtokólik joldyń júrý bóligine shyǵaryldy.

Budan bólek, osy aýdandaǵy basqa ýchaskede qarǵa batyp qalǵan 3 avtokólik súıretý arqanynyń kómegimen qaýipsiz jerge jetkizildi.

Jalpy qutqarýshylar 9 azamatqa kómek kórsetti. Zardap shekkender joq.

Tótenshe jaǵdaılar mınıstrligi júrgizýshilerdi aýa raıy jaǵdaılaryn eskerip, jolda qaýipsizdik sharalaryn saqtaýǵa shaqyrdy.

Aıta keteıik, Jambyl oblysynyń birneshe aýdanynda jaýyn-shashyn mólsheri qaýipti deńgeıden asty.