Jambyl oblysynda kýrer ınternet-alaıaqtarǵa kómektesti degen kúdikpen ustaldy
ASTANA. KAZINFORM – Jambyl oblysynyń polıtseıleri Almaty qalasynda ınternet-alaıaqtarǵa kómektesti degen kúdikpen 22 jastaǵy er adamdy ustady, dep habarlaıdy Polisia.kz.
Tergeý málimetinshe, kúdikti qylmystyq shemany uıymdastyrýshylardyń tapsyrmasymen kýrer qyzmetin atqaryp, bank kartalary men uıaly telefondardy tasymaldaǵan, sondaı-aq bankomattar arqyly qolma-qol aqsha sheshýmen aınalysqan.
– Aldyn ala málimetterge sáıkes, kúdikti 2026 jylǵy sáýir aıynan bastap bank kartalary men telefondardy jetkizýmen aınalysqan. Tergeý barysynda osy kezeńde onyń birneshe ret Qazaqstan Respýblıkasynan tys jerlerge shyǵyp, Qazaqstan azamattarynyń bank kartalaryn ınternet-alaıaqtyqpen aınalysatyn qylmystyq toptyń quramyna kirýi múmkin anyqtalmaǵan tulǵalarǵa tapsyrǵany belgili boldy, – delingen polıtsııa habarlamasynda.
Kúdiktini ustaý kezinde odan bes uıaly telefon jáne ekinshi deńgeıdegi túrli bankterge tıesili 13 bank kartasy tárkilengen. Aldyn ala málimet boıynsha, karta ıeleri olardy aqshalaı syıaqy úshin óz erkimen paıdalanýǵa bergen.
Atalǵan derek boıynsha sotqa deıingi tergep-tekserý bastaldy.
– Polıtsııa azamattardy bank kartalaryn, olardyń derektemelerin jáne uıaly qurylǵylaryn bógde adamdarǵa bermeýge, sondaı-aq bank shottaryn paıdalaný nemese aqsha aýdarymdaryn júzege asyrý arqyly «jeńil tabys» tabýdy usynatyn kúmándi usynystarǵa kelispeýge shaqyrady. Mundaı áreketter qylmystyq jaýapkershilikke ákep soǵýy múmkin, – dep eskertti vedomstvo.
Aıta keteıik, BQO-da alaıaqtyq jasaǵan sheneýnikke 7 mln teńge aıyppul salyndy.
