Jambyl oblysynda quldyqqa túsken jasóspirimderdiń isi boıynsha úkim shyqty
ASTANA. KAZINFORM – Kámeletke tolmaǵan ógeı uldaryn qorlady dep aıyptalǵan ógeı áke úkimmen kelispeı, apellıatsııalyq shaǵym túsirmekshi, dep habarlaıdy Kazinform tilshisi.
Jambyl oblysynda QR Qylmystyq kodeksiniń 110-baby «Azaptaý» boıynsha aıyptalyp otyrǵan Uzaqbaı Turbaevqa qatysty qylmystyq isti qaraý aıaqtaldy. Tergeý málimetinshe, jasóspirimder júıeli túrde soqqyǵa jyǵylyp, negizgi qajettilikteri shektelip otyrǵan. Sotta naqtylanǵandaı, bul faktiler buryn keńinen qoǵamdyq narazylyq týdyrǵan medıtsınalyq qujattar men beınejazbalarmen rastalyp otyr.
Turbaevtyń ózi kinásin moıyndamaı, jalǵan aqparat taratylǵanyn jáne balalardyń otbasylaryna oralǵysy keletinin málimdedi.
Sot otyrysy barysynda aıyptaý tarapy balalardyń bilim alýdyń ornyna úı sharýasymen jáne mal baǵýmen aınalysqanyn taǵy da atap ótti. Olardyń fızıkalyq jaǵdaıy týraly da aıtylǵan: jasóspirimder jastaryna saı emes damyǵan, aryq jáne kútimsiz kórindi. Sotta balalardyń «kútimin qıyndatpaý úshin» shashtary taqyrlap alynǵany aıtyldy, biraq aıyptalýshy muny «uldardyń shashy qysqa bolýy kerek» dep túsindirdi.
Aıyptaýshy tarap bul mán-jaılar ata-analar men zańdy ókilderge orta bilim alýdy qamtamasyz etý mindetin júkteıtin «Bilim týraly» zańǵa, sondaı-aq olardy balalardyń densaýlyǵyna, tárbıesine jáne turmystyq jaǵdaılaryna qamqorlyq jasaýǵa mindetteıtin «Neke jáne otbasy týraly» zańǵa tikeleı qaıshy keletinin atap ótti.
Qorǵaýshy tarap otbasynyń «adamdar sııaqty ómir súrgenin» jáne eshqandaı normalardy buzbaǵanyn, al balalarǵa daýys kóterý kez kelgen otbasyndaǵydaı bolǵanyn alǵa tartty.
Turbaevtyń áke retinde áreket etkeni, al bıologııalyq ata-anasy alıment tóleýmen shektelgenin atap ótildi. Qorǵaýshy tarap sonymen qatar aıyptalýshynyń dindarlyǵyn oń sıpattama retinde aıtty, biraq aıyptaý tarapy buǵan kúmán keltirip, onyń is-áreketteri Qazaqstanda qabyldanǵan ıslam erejelerine sáıkes kelmeıtinin jáne dástúrli emes senimderdiń belgileri bolýy múmkin ekenin jetkizdi.
Qudaıǵa senetin qandaı ata-ana balalaryn sonshalyqty qatygezdikpen ura alady? Sotta qoıylǵan suraq rıtorıkalyq bolyp qaldy.
Aıyptaý tarapy Turbaevqa tórt jyl segiz aıǵa bas bostandyǵynan aıyrý jazasyn surady. Sottalýshy óz kinásin moıyndamaýyn jalǵastyrdy, al onyń advokaty tolyq aqtalýyn talap etti.
Alaıda sot is materıaldary men taraptardyń dálelderin qarap shyqqannan keıin Uzaqbaı Turbaevty kámeletke tolmaǵandardy azaptaǵany úshin kináli dep tanyp, tórt jylǵa bas bostandyǵynan aıyrý jazasyn taǵaıyndady.
Qorǵaýshy tarap úkimmen kelispeıtinin jáne apellıatsııalyq shaǵym túsirýge nıetti ekenin málimdedi.
Buǵan deıin Jambyl oblysy Talas aýdanynda kámeletke tolmaǵan balalar vıdeoúndeý jazyp, ózderin májbúrli jumysqa jekkenin, qorlyq kórip, soqqyǵa jyǵylǵandaryn aıtqan.