Jambyl oblysynda kóterme saýdadaǵy kómir baǵasy eki ese arzan

ASTANA. KAZINFORM – Bul rette qatty otynǵa degen suranys negizinen aýyldyq aımaqtar kóp bolyp otyr. Al óńir tutynatyn kómirdiń 7,5 paıyzy Taraz qalasyna tıesili.

Búgingi tańda oblysta naryqtyń 31 sýbektisi kómir saýdalaıtyn bolsa, kómir satatyn oryndarda 8,3 myń tonna otyn jınalyp qalǵan. Baǵasy tonnasyna 19-dan 23 myń teńgege deıin barady. Alaıda kómirdi qappen alǵan kezde onyń baǵasy qymbattaı túsedi. Sebebi 50 kg bolatyn bir qap kómirdiń baǵasy sapasyna qaraı 2100-2500 teńge bolady. Taza, iriktelgen kómir árıne, qymbat. Al arzandary kómirdiń úgitilip, usaqtalyp ketken túri.

Kómirdi jetkizýge ketetin shyǵyn 700-100 teńge aralyǵynda. Osylaısha, 1 tonna kómirdiń kılogramy búkil shyǵyndarymen eseptegende 42-50 myń teńgege shyǵady.

Mamandardyń baǵalaýynsha, Jambyl oblysyna aldaǵy jylytý maýsymyna shamamen 135 myń tonna kómir kerek. Taraz qalasynda búginde 2006 jer úı áli gazǵa qosylmaǵan, olardy jylytýǵa 10 myń tonnadan astam qatty otyn qajet. Qazirgi tańda qalada kómirdi satýmen jeti kásipker aınalysyp otyr.

Kómirdiń aıtarlyqtaı bóligi bıýdjettik uıymdardyń avtonomdy qazandyqtaryn qamtamasyz etýge jumsalady. Olardyń úlesi óńirdiń jalpy qajettiliginiń jartysyna jýyqtaıdy. Maýsym boıy qazandyqtarǵa 56,2 myń tonna kómir jetkizý josparlanǵan, onyń 48,9 myń tonnasy bilim berý mekemelerin jylytýǵa baǵyttalady.

Ákimdik málimetinshe, búgingi kúni qajetti kólemniń úshten ekisi, ıaǵnı, 33,1 myń tonna kómir jetkizilgen.

Osyǵan deıin elimizdiń kómir óndirýden on iri eldiń qataryna kiretini týraly jazdyq.