Jambyl oblysynda kóshi-qon arnasyn uımdastyrdy degen kúdikpen 4 adam ustaldy
ASTANA. KAZINFORM - Almaty qalasynda belgilengen ótkizý pýnktterinen tys Qazaqstannyń Memlekettik shekarasyn zańsyz kesip ótken Qyrǵyzstan men Ózbekstannyń 10 azamaty anyqtaldy, dep habarlady Jambyl oblystyq prokýratýrasynyń baspasóz qyzmeti.
Zańsyz kóshi-qondy uıymdastyrý faktileriniń jolyn kesý maqsatynda Qordaı aýdanynyń prokýratýrasy Ulttyq qaýipsizdik jáne ishki ister organdary qyzmetkerleriniń qatysýymen vedomstvoaralyq tergeý-jedel tobyn qurdy.
Júrgizilgen kelisilgen tergeý-jedel is-sharalar kesheni nátıjesinde bıylǵy mamyr-shilde aılary aralyǵynda Almaty qalasy aýmaǵynda belgilengen ótkizý pýnktterinen tys Qazaqstan Respýblıkasynyń Memlekettik shekarasyn zańsyz kesip ótken Qyrǵyzstan jáne Ózbekstan Respýblıkalarynyń 10 azamaty anyqtaldy.
Zańsyz kóshi-qon arnasyn uıymdastyrdy degen kúdikpen 4 adam áshkerelenip, ustaldy. Olardyń 3-eýi Qazaqstan Respýblıkasynyń, 1-eýi Qyrǵyz Respýblıkasynyń azamaty.
Sotqa deıingi tergep-tekserý materıaldary boıynsha Qyrǵyz Respýblıkasynyń azamaty sheteldik azamattardy Memlekettik shekaraǵa deıin súıemeldeýdi júzege asyrǵan. Keıinnen olardy Qazaqstan Respýblıkasynyń aýmaǵynda Almaty qalasyna odan ári tasymaldaýdy onyń sybaılastary qamtamasyz etken.
Barlyq kúdiktige qatysty qamaýǵa alý túrindegi bultartpaý sharasy tańdaldy.
Atalǵan fakt boıynsha QR QK 394-babynyń 2-bóligi boıynsha sotqa deıingi tergep-tekserý júrgizilip jatyr.
QPK-tiń 201-babynyń talaptaryna sáıkes ózge aqparat jarııa etýge jatpaıdy.
Qordaı aýdanynyń prokýratýrasy Memlekettik shekarany zańsyz kesip ótý, sol sııaqty zańsyz kóshi-qondy uıymdastyrý Qazaqstan Respýblıkasynyń qoldanystaǵy zańnamasynda kózdelgen qylmystyq jaýaptylyqqa ákep soǵatynyn eskertedi.
Shekara aımaǵynda zańdylyqty qamtamasyz etý jáne buzýshylyqtarǵa qarsy is-qımyl boıynsha jumystar jalǵasýda.
Osyǵan deıin Qyzylordada kóshi-qon zańnamasyn buzýdyń 100-den astam deregi tirkelgenin jazǵan edik.
