Jambyl oblysynda Kongo-Qyrym qyzbasyna qarsy zalalsyzdandyrý jumystary bastalady
TARAZ. KAZINFORM — Jambyl oblysynda Kongo-Qyrym gemorragııalyq qyzbasynyń aldyn alý maqsatynda 24 400-ge jýyq qora-jaıda zalalsyzdandyrý jumystary júrgiziledi. Bul týraly oblystyq ákimdik málim etti.
Jambyl oblysynda Kongo-Qyrym gemorragııalyq qyzbasyna qarsy zalalsyzdandyrý jumystary 15 sáýirden bastalady. Bul týraly oblys ákimi Erbol Qarashókeevtiń tóraǵalyǵymen ótken apparat keńesinde veterınarııa basqarmasynyń basshysy Baqyt Betbaev habarlady.
Baqyt Betbaev baıandamasynda Kongo-Qyrym gemorragııalyq qyzbasynyń aldyn alý sharalaryna keńinen toqtaldy.
— Óńirdegi 46 eldi meken Kongo-Qyrym gemorragııalyq qyzbasynyń tabıǵı oshaǵynda ornalasqan. Bıyl 24 392 qora-jaı (kólemi 5,7 mln sharshy metr) men 168 myń sharshy metr býferlik aımaqqa, barlyǵy 580 myń bas aýyl sharýashylyǵy janýaryna zalalsyzdandyrý jumystary ІІІ kezeń boıynsha júrgiziledi, — delingen habarlamada.
Zalalsyzdandyrýdyń birinshi kezeńi aǵymdaǵy jyldyń 15 sáýirinen bastalyp, ІІ-ІІІ kezeńderi tamyz-qyrkúıek aılarynda atqarylady.
Іs-sharalarǵa qajetti dári-dármek tolyǵymen satyp alyndy.
Zalalsyzdandyrý jumystaryn veterınarııa basqarmasyna qarasty veterınarııalyq stantsııa júrgizedi. Oǵan 38 veterınar men 23 birlik tehnıka jumyldyrylady.
Jyl basynan beri kene shaqqan adamdardyń qan synamasy Kongo-Qyrym gemorragııalyq qyzbasyna teris nátıje kórsetti.
— Zalalsyzdandyrý sharalary sapaly oryndalýy tıis. Jumystyń nátıjesi kún saıyn zerdelenip otyrýy qajet, — degen Erbol Qarashókeev jeke turǵyn úılerdiń aýlalarynda jáne mal qoralarynda mehanıkalyq tazalaý jumystaryn júrgizýdi tapsyrdy.
Budan bólek, keneden saqtaný joldaryn oqýshylarǵa keńinen túsindirýdi, mal bazarlary men qasaphanalarda sanıtarlyq normalardyń saqtalýyn qatań baqylaýǵa alýdy eskertti.
Basqosýda energetıka jáne turǵyn úı-kommýnaldyq sharýashylyq basqarmasynyń basshysy Ǵalym Isaqov «Taza Qazaqstan» ekologııalyq aktsııasy aıasynda atqarylǵan jumystardyń esebin berdi.
Oblys ákimi eldi mekenderdi abattandyrý, kógaldandyrý jáne sanıtarlyq tazalaý jumystaryn sapaly júrgizý, saıabaqtar men balalar oıyn alańshalaryn retke keltirý, turǵyndardyń ekologııalyq mádenıetin nyǵaıtý boıynsha jaýaptylardyń aldyna naqty mindetter qoıyp, oryndalý merzimin belgiledi.