Jambyl oblysynda kóligine 8,5 keli marıhýana jasyrǵan kúdikti ustaldy
ASTANA. KAZINFORM – Jambyl oblysynda polıtseıler 8,5 keli marıhýana tárkilep, kúdiktige qatysty sotqa deıingi tergeý bastady, dep habarlaıdy Kazinform tilshisi.
Jambyl oblysynda Shý alqabynan esirtkini zańsyz áketýdiń jolyn kesýge baǵyttalǵan is-sharalar jalǵasyp jatyr. Osyndaı derekterdiń biri Shý – Qaınar avtojolynda anyqtaldy.
«Qarasora-2026» jáne «Kanal – ıAntarnyı bereg» respýblıkalyq jedel aldyn alý is-sharalary barysynda Jambyl oblysy polıtsııa departamentiniń esirtki qylmysyna qarsy is-qımyl basqarmasynyń qyzmetkerleri VAZ-21213 avtokóligin toqtatty.
Kólikti Shý aýdanynyń turǵyny basqarǵan. Avtokólikti tekserý kezinde polıtseıler qaptyń ishinen 8 keli 500 gramm marıhýana tapqan.
Tintý jumystaryna «Búrkit» arnaıy bólimshesiniń qyzmetkerleri men Heppı esimdi qyzmettik-izdestirý ıti tartyldy.
Polıtsııanyń málimetinshe, jyl basynan beri mobıldi toptar Jambyl oblysynan elimizdiń basqa óńirlerine esirtkini zańsyz tasymaldaýdyń segiz arnasynyń jolyn kesken.
Atalǵan derek boıynsha esirtki zattaryn asa iri mólsherde ótkizý maqsatynda zańsyz ıemdený, saqtaý, tasymaldaý, jóneltý nemese ótkizý baby boıynsha sotqa deıingi tergeý júrgizilip jatyr.
Eske sala ketsek, jyl basynan beri elimizde ishki ister organdary 1885 esirtki qylmysynyń jolyn kesti.
Sondaı-aq esirtki aınalymyna qarsy kúres is-sharalary aıasynda 6 uıymdasqan qylmystyq top joıyldy.
