Jambyl oblysynda qyzylsha aýrýy órship tur

Bıyl elimizde 12 myńnan, onyń ishinde Jambyl oblysynda 1600-den astam qyzylsha aýrýy tirkeldi. Oblysta 80 paıyzdan astam jaǵdaıda vaktsınatsııalanbaǵan jas balalar zardap shekti, dep habarlaıdy Kazinform.

Óńirde qyzylsha aýrýynyń órshýine baılanysty oblystyq densaýlyq saqtaý basqarmasynyń basshysy Janar Ospanova úndeý jasady.

«Qyzylsha – pnevmonııa, mıǵa asqynýlarǵa nemese naýqastyń ólimine ákelýi múmkin. Kez kelgen adam qyzylshamen aýyratyn adammen baılanysta bolsa, aýrýdy juqtyrýy múmkin, ásirese ekpesi joq balalar.

Qyzylshany emdeýge arnalǵan arnaıy dári preparaty joq, emdeý tek sımptomatıkalyq bolyp tabylady. Sondyqtan qyzylshamen kúresýdiń eń tıimdi joly –vaktsınatsııa. Qazaqstan Respýblıkasynyń Ulttyq profılaktıkalyq egý kúntizbesine sáıkes, balalardy qyzylshaǵa qarsy josparly egý 1 jasta jáne 6 jasta júrgiziledi.

Eldegi qyzylshaǵa qatysty epıdemıologııalyq jaǵdaıdy turaqtandyrý úshin bıyl 6 qarashadan bastap balalardy qosymsha ımmýndaý jumysy bastaldy. Ol 2024 jyldyń qańtaryna deıin jalǵasady», – delingen úndeýde.

Óńirdiń bas dárigeriniń aıtýynsha, 6 aıdan 11 aıǵa deıingi, 2-3-4 jas aralyǵyndaǵy balalar vaktsınatsııa statýsyna qaramastan jáne egilmegen medıtsına qyzmetkerleri qyzylshaǵa qarsy 1 ekpesin alady. Vaktsınatsııa Úndistanda óndirilgen KKP vaktsınasymen (qyzylsha-qyzamyq-parotıt) júrgiziledi.

Aıta keteıik, bıyl oblysta 38 myńnan astam bala qyzylshaǵa qarsy josparly ekpe aldy, al 1587 bala qosymsha egildi, jaǵymsyz reaktsııalar baıqalmady.

Janar Ospanova úndeýde ata-analardyń profılaktıkalyq ekpelerdiń qajettiligine áli de kúmáni bolsa, birden bas tartpaı, dárigermen keńesip, juqpaly aýrýdyń qaýiptiligi jáne odan bas tartýdyń saldary týraly aqparattarmen tanysýǵa keńes berdi.

Árbir ata-ana balasynyń densaýlyǵyna birinshi jaýapty ekenin eskertti.

Buǵan deıin Tarazda jańa týǵan sábıdi 1,5 mln teńgege satqan akýsherlerge úkim shyqqanyn habarlaǵan bolatynbyz.