Jambyl oblysynda «Qyzǵaldaq mura» halyqaralyq festıvali ótedi
ASTANA.KAZINFORM — «Qyzǵaldaq mura» festıvali: Jambyldyq 100 qolónershi kıiz basyp, Qazaqstannyń rekordtar kitabyna enedi.
Jer jahanǵa Greıg qyzǵaldaǵynyń «otany» retinde tanylǵan Jambyl oblysy kóktemde qyzyl kilemge oranǵandaı qulpyrady. Sáýir-mamyr aılarynda óńirdiń jazıraly dalasy alqyzyl, sary, qyzǵylt tústi qyzǵaldaqtarmen kómkerilip, tabıǵattyń ǵajaıyp kórinisin syılaıdy.
Osy erekshelikti eskere otyryp, 2025 jyldyń 2-3 mamyr kúnderi Jambyl oblysy ákimdiginiń qoldaýymen Talas aýdany, Eseıhan aýyly, Qarataý taýynyń bókterinde «Qyzǵaldaq mura» halyqaralyq festıvali uıymdastyrylady.
Kásipkerlik jáne ındýstrıaldy-ınnovatsııalyq damytý basqarmasynyń basshysy Aspandııar Seısebaev festıval aıasynda ótetin is-sharalar josparyn tanystyrdy.
Festıvaldiń maqsaty — Jambyl oblysynyń týrıstik áleýetin arttyrý, qyzǵaldaqtardyń tabıǵı ósý ortasyn saqtaý jáne mádenı murany urpaqtan-urpaqqa jetkizý.
Halyqaralyq deńgeıdegi sharaǵa Germanııa, Ýkraına, Túrkııa, Qyrǵyzstan, Reseı, Iran jáne Gollandııadan kelgen sheteldik qonaqtar qatysady dep kútilip otyr.
Eki kúndik festıval aıasynda ǵylymı konferentsııa, florısterge arnalǵan sheberlik saǵaty, ulttyq sport oıyndary, sán kórsetilimi, qolónershiler jármeńkesi ótedi.
Konferentsııada álemniń belgili ǵalymdary, sarapshylar, botanıka, ekologııa, jaratylystaný ǵylymdarynyń mamandary, sheteldik jáne otandyq zertteýshiler qyzǵaldaqtardy biregeı mura retinde saqtaý jáne olardy qorǵaý máselelerin jan-jaqty talqylaıdy. Konferentsııa qonaqtary úshin tarıhı-mádenı nysandarǵa ekskýrsııa uıymdastyrylady. Nıderlandy, Qyrǵyz Respýblıkasynyń jáne óńirdiń jetekshi florısteri qatysýshylarǵa gúl shoǵyn jasaý óneriniń qyr-syryn úıretip, tájirıbelerimen bólisedi. Sonymen birge florıster dostastyq pen yntymaqtastyq týraly kelisimge qol qoıady. Bul bastama elder arasyndaǵy gúl ósirý mádenıeti men shyǵarmashylyqtyń berik negizin qalamaq.
Tabıǵat aıasynda ulttyq sport túrlerinen saıystar ótedi. Atap aıtqanda, aýdaryspaq, qazaq kúresi, qoshqar kóterý, qol kúresi, dástúrli sadaq atý, arqan tartý, asyq atý, tazy ıtter jarysy boıynsha jeńimpazdar belgili bolady.
Sán kórsetilimi «Qyzǵaldaq sáni» taqyrybyna arnalady. Jergilikti 14 dızaıner zamanaýı jáne ulttyq naqyshtaǵy sán úlgilerin kópshilik nazaryna usynady.
Sondaı-aq «Qymyzmuryndyq» rásimi aıasynda «úzdik bıe saýýshy» anyqtalady. «Qazyq qaǵý», «Bıe baılaý» dástúrleri dáriptelip, «Qymyz ashytý» boıynsha sheberlik saǵaty ótedi.
100 qolónershiniń qatysýymen 20×10 metrlik qyzǵaldaq beınesi salynǵan kıiz basylyp, Qazaqstannyń KInES rekordtar kitabyna engizilmek.
Oblys turǵyndary men qonaqtary úshin tamaq pen sýsyn satylatyn fýdkort uıymdastyrylady.