Atyraýda «Kvadrat» býlaný alańyn tazalaý jumysy jospardan keshigip jatyr
ATYRAÝ. KAZINFORM — Atyraýdaǵy «Kvadrat» býlaný alańyn rekýltıvatsııalaý jumysy qarjylandyrý men jobalyq ózgeristerge baılanysty uzaqqa sozylyp ketti. 2022 jyly bastalǵan joba áli tolyq aıaqtalǵan joq.
2022 jyly bastalǵan jobanyń jalpy quny 7 mlrd teńgeni quraıdy. Jobany «Pavlodar ózen porty» AQ júzege asyryp jatyr. Merdiger mekeme ókilderiniń aıtýynsha, búginge deıin 4 mlrd teńgeniń jumysy oryndalǵan. Joba jetekshisi Nurbolat Dosalıev qarjylandyrý tolyq qamtamasyz etilse, jumys 2026 jyly aıaqtalatynyn aıtty.
— Eger bıyl bıýdjet qarajaty tolyq kólemde bólinse, onda jobany 2026 jyly aıaqtaımyz. Qazirgi tańda 1,4 mıllıard teńge ǵana bólindi. Qarjylandyrýdyń jetkiliksiz bolýyna baılanysty biz áli kúnge deıin avans alǵan joqpyz. Qosymsha kelisim de jasalǵan joq. Barlyq tehnıkalyq másele tapsyrys berýshimen birlesip sheshilip jatyr, — dedi joba jetekshisi Nurbolat Dosalıev.
Al qalalyq ákimdik ókili qalǵan 3 mlrd teńge qarjy bólinip turǵanyn, istelgen jumystyń esebine saı tólem jasalatynyn aıtty. 2024 jyly bul joba jarty jylǵa toqtap qaldy. Buǵan materıaldardyń qymbattaýyna baılanysty smetaǵa ózgerister qajettiligi týyndaýy sebep. Degenmen oblystyq bıýdjettik komıssııa qosymsha qarjy bólmegen. Endi merdiger alǵashyndaǵy qarjyǵa moınyna alǵan jumysty aıaqtaýy kerek.
— «Kvadrat» býlaný alańynda tazartylmaı qalǵan, ıaǵnı joba aıasyndaǵy jumys tolyq aıaqtalǵannan keıin qalyp qoıǵan shógindiler tazartylatyn bolady. Jalpy merdiger mekeme jobany tolyq aıaqtaǵannan keıin de súıemeldeý jumystaryn júrgizedi.Kepildik merzimi — 2 jyl, — dedi Atyraý qalalyq TÚKSh jáne turǵyn úı ınspektsııasy bóliminiń sektor meńgerýshisi Máýlen Salamatov.
Jalpy jospar boıynsha alańdaǵy 1 mln 700 myń tekshe metr las tunba tazartylýy tıis. Qazirgi ýaqytta merdiger 900 myń tekshe metrden asatyn kólemdegi tunbany tazartyp úlgergen. Búginge deıin dambanyń qurylysy, geotútikter ornatý, geotekstıl jáne geomembrana materıaldary, flokýlıant pen koagýlıant sııaqty hımııalyq reagentterdi jetkizý, sondaı-aq sý qabyldaý qudyǵynyń montajy syndy jumys aıaqtalǵan. Aldaǵy 2 aptada 3 túp tereńdetin keme jetkizilip, sarqyndy sý arnaıy daıyndalǵan orynǵa jiberiledi.
Jalpy bul býlaný alańyna 2021 jyldan beri sarqyndy sý tógýge sotpen tyıym salynǵan. Osy jaǵdaıdan keıin ekologııa mınıstrligi men oblystyq ákimdik arasynda jol kartasy daıyndalyp, Atyraý oblysy Sý Arnasynyń mekemesiniń ótinishi negizinde bul merzim birneshe márte keıinge shegerilgen. Sońǵy sheshim boıynsha osy jyldyń tamyz aıynan keıin bul alańǵa sarqyndy sý tógýge ruqsat joq.
— Bul jerde bir jaıtty túsiný kerek. Osy másele boıynsha qoǵam ókilderi de sotqa júgingen edi. Nátıjesinde taraptar medıatsııalyq kelisimge keldi. Sol kelisim aıasynda aǵyndy sýlardyń qaı jerge tógiletinine turaqty monıtorıng júrgiziledi. Bul másele erekshe baqylaýǵa alynǵan. Al qalanyń oń jaǵalaý bóligin túgeldeı káriz júıesinen ajyratý múmkin emes ekenin de túsiný qajet. Óıtkeni bul aýmaqta turǵyndardan bólek áleýmettik nysandar — aýrýhanalar, mektepter, balabaqshalar jáne basqa da mekemeler ornalasqan, — dep pikir bildirdi Atyraý oblysy boıynsha ekologııa departamenti basshysynyń orynbasary Erlan Esenov.
Ekologtardyń málimetinshe, býlaný alańynyń sanıtarlyq-qorǵaý aımaǵynan tys aýmaqta 3 márte aýa sapasyna taldaý júrgizilgen. Nátıjesinde atmosferadaǵy kúkirtsýtegi kontsentratsııasynyń shekti normadan 43 esege deıin artqanyn kórsetken. Ákimdik aldaǵy ýaqytta tazartylǵan sýdy tehnıkalyq maqsatta paıdalaný jáne býlaný alańy aýmaǵyn kógaldandyrý jumysyn júrgizýdi josparlap otyr.
Buǵan deıin ekologtar atyraýlyqtardyń shaǵymynan keıin aýa quramyn teksergenin jazǵan edik.
