Jambyl oblysynda kezekte turǵandarǵa arnalǵan 350 páterdiń tek 92-si satyp alynǵan
TARAZ. KAZINFORM – Jambyl oblysynda bıyl áleýmettik osal toptarǵa arnap satyp alý josparlanǵan 350 jaldamaly páterdiń ázirge 92-si ǵana alynǵan. Óńir basshysy Erbol Qarashókeev turǵyn úı bólý jumysyn jedeldetýdi tapsyrdy, dep habarlaıdy Kazinform tilshisi.
Oblystyq qurylys basqarmasynyń basshysy Erlan Orynbaevtyń málimetinshe, bıyl óńirde 2035 azamatty áleýmettik turǵyn úımen qamtamasyz etý josparlanǵan. Bul maqsatqa 20 mlrd teńge qarastyrylǵan.
Áleýmettik osal toptarǵa arnalǵan 350 jaldamaly páterdi satyp alýǵa respýblıkalyq bıýdjetten 4,9 mlrd teńge bólingen. Alaıda qazirgi ýaqytqa deıin onyń 92-si ǵana satyp alynyp, taǵy 258 páterdi alý qajet bolyp otyr.
Sonymen qatar jaldamaly turǵyn úılerdi «Otbasy bank» arqyly bólý jumystary júrgizilip jatyr.
Oblystyq energetıka jáne turǵyn úı-kommýnaldyq sharýashylyq basqarmasynyń basshysy Nursultan Isabekovtiń aıtýynsha, bıyl bankke bólý úshin 1636 páter berilgen. Onyń 1249-y boıynsha azamattar maquldaý alǵan.
Bıýdjet qarajaty esebinen oblysta 2941 páterlik 66 kópqabatty turǵyn úı salynyp jatyr. Jyl sońyna deıin 1685 páterlik 35 úıdiń qurylysyn aıaqtaý josparlanǵan. Qazirdiń ózinde Uly dala shaǵynaýdanynda 345 páterlik bes turǵyn úı paıdalanýǵa berildi.
Asqarov kóshesindegi jańa turǵyn alabynda 1176 páterlik 30 kredıttik turǵyn úıdiń qurylysy bastalǵan. Budan bólek, 1800 páterlik taǵy 36 úıdiń jobasy ázirlendi.
Jıynda oblys ákimi Erbol Qarashókeev jaldamaly jáne kredıttik páterlerdi bólýdi jedeldetip, merdiger uıymdarmen jumysty kúsheıtýdi tapsyrdy.
Sondaı-aq qurylysy júrip jatqan nysandardy belgilengen merzimde aıaqtaý qajettigin eskertti.
Óńir basshysy qurylys qunynyń qymbattaýyna jáne jumys merziminiń sozylýyna ákeletin jobalardy negizsiz túzetýge jol bermeýdi talap etti.
Jıynda jeke turǵyn úı qurylysyna arnalǵan jer telimderin bólý máselesi de qaraldy.
Qazirgi ýaqytta Jambyl oblysynda jer telimin alý kezeginde 260 197 adam tur. Óńirde bul tizimdi ózektendirý jumystary júrgizilip jatqanymen, onyń qarqyny oblys ákiminiń synyna ushyrady.
Osyǵan baılanysty Taraz qalasy men aýdan ákimderine jer kezegin jańartý jáne jer telimderin rezervke qoıý jumystaryn jedeldetý tapsyryldy.
Injenerlik kommýnıkatsııalarmen qamtamasyz etilgen jer telimderin azamattarǵa kezektilik tártibin qatań saqtaı otyryp, múmkindiginshe tezirek berý qajettigi aıtyldy.
Aıta keteıik, buǵan deıin «Otbasy bank» turǵyn úı kezeginde turǵan azamattardyń derekterin túgendeý tártibin ózgertkeni habarlanǵan. Jańa erejege sáıkes, bank azamattardyń jeke kelisiminsiz de derekterdi teksere alady. Alaıda kezektegi ornyn saqtaý turǵyn úıdi bólýge avtomatty túrde qatysýǵa múmkindik bermeıdi. Ol úshin derekterdi tekserý rásimi tolyq aıaqtalýy tıis.
