Jambyl oblysynda QazUÝ túlegi memleketke oqý aqysyn qaıtarýǵa mindetteldi

TARAZ. KAZINFORM – Moıynqum aýdandyq sotynda erekshe is qaraldy. QazUÝ-dy memlekettik grantpen támamdaǵan stýdent joldamamen úsh jyl jumys isteý mindetin oryndamaǵandyqtan, memleketke 2,5 mln teńge qaıtarýǵa mindetteldi.

«Qarjy ortalyǵy» AQ túlekke qatysty talap aryz túsirip, memlekettik grant arqyly tólengen oqý shyǵyndaryn óndirýdi surady.

Jaýapker ál-Farabı atyndaǵy Qazaq ulttyq ýnıversıtetine aýyl jastaryna arnalǵan kvota boıynsha túsip, respýblıkalyq bıýdjet qarajaty esebinen bilim alǵan. Dıplom alǵan soń úsh jyl jumys isteýi tıis bolǵanymen, bul mindetin oryndamaǵan.

Ol 2023 jyly oqýyn támamdaǵannan keıin jumys ornyna barmaǵan jáne jumyspen qamtý ortalyǵynda tirkelmegen. Osyǵan baılanysty memleketke 2,5 mln teńge shyǵyndy óteý, sondaı-aq 666 myń teńge kóleminde ósimpul tóleý talaby qoıyldy.

Sot negizgi qaryz – 2,5 mln teńgeni tolyq óndirip alýdy uıǵardy. Alaıda talapkerdiń keshigip júginýine baılanysty ósimpul kólemin on ese azaıtyp, 66 myń teńge kóleminde belgiledi.

Eske sala keteıik, pedagogıkalyq mamandyqta oqıtyn stýdentterdiń stıpendııasy 84 myń teńge bolady.