Jambyl oblysynda qaza bolǵan oqýshynyń otbasy fotoǵa baılanysty janjal týyndaǵanyn aıtty
ASTANA. KAZINFORM – Týystarynyń aıtýynsha, muǵalim 200 myń teńge kóleminde aıyppul salynatynyn aıtyp, oqýshynyń ákesin mektepke shaqyrtýdy talap etken. Osydan keıin 14 jastaǵy Qýanysh mektepten shyǵyp ketken kúıi qaıta oralmaǵan, dep habarlaıdy Kazinform agenttiginiń tilshisi.
Oqıǵaǵa jarty jyldan astam ýaqyt ótse de, otbasy bul jaǵdaı týraly kópshilikke tek qazir ǵana aıtyp otyr. Týystarynyń sózinshe, 25 aqpan kúni Qordaı aýdanyna qarasty Qarakemer aýylynda algebra sabaǵy kezinde bala synyptasyna taqtadaǵy jazbany sýretke túsirip jibermek bolǵan. Alaıda kadrǵa baıqamaı muǵalim de túsip qalǵan.
Osydan keıin pedagog 200 myń teńge kóleminde aıyppul salynatynyn aıtyp, oqýshydan túsinikteme jazýdy jáne ákesin mektepke shaqyrtýdy talap etken.
Osydan soń Qýanysh mektepten shyǵyp ketken kúıi úıine oralmaǵan.
Týystarynyń aıtýynsha, balanyń joǵalǵanyn bir saǵatqa jýyq eshkim baıqamaǵan. Muǵalim keıin otbasyna habarlasyp, balanyń mektepten shyǵyp ketkenin jáne odan beri kórinbegenin aıtqan. Arada biraz ýaqyt ótken soń qoradan jasóspirimniń denesi tabyldy. Qaıǵyly oqıǵanyń ótkenine jeti aı bolǵannan keıin otbasy bul oqıǵany kópshilikke jarııalap, qaıǵyly jaǵdaıǵa deıin bolǵan oqıǵalardyń barlyǵyn jan-jaqty ári obektıvti túrde tekserýdi surap otyr.
Bizdiń arqasúıer tanysymyz da, yqpaldy adamdarmen baılanysymyz da joq. Biz tek ádildik ornaǵanyn qalaımyz, – dep jazdy Qýanyshtyń ápkesi áleýmettik jelidegi jazbasynda.
Polıtsııanyń málimetinshe, jasóspirimniń qaza bolý faktisi boıynsha qylmystyq is qozǵalǵan.
– Oqıǵanyń mán-jaıyn tolyq anyqtaý úshin barlyq qajetti tergeý áreketteri júrgizilip jatyr, – dep jaýap berdi vedomstvo ókilderi.
Buǵan deıin Qordaı aýdanynda kámeletke tolmaǵandarǵa qatysty birneshe qaıǵyly oqıǵa boıynsha tergeý júrgizilgen. Naýryz aıynda Qaınar jáne Masanshy aýyldarynda eki jasóspirim qaza tapqan. Osy eki derek boıynsha da polıtsııa sýıtsıdke deıin jetkizý baby boıynsha qylmystyq is qozǵap, tergeýdi bastaǵan.
Shilde aıynda Qordaı aýdanyna qarasty Sortóbe aýylynda taǵy bir jasóspirimniń qaza bolǵany belgili boldy. Bul derek boıynsha da QR Qylmystyq kodeksiniń 105-baby negizinde sotqa deıingi tergeý bastalǵan.
