Shýdaǵy shý: aýrýhanada qaıtys bolǵan áıeldiń týystary janjal shyǵardy
ShÝ. KAZINFORM - Áleýmettik jelide marqumnyń týystary aýrýhana ǵımaratyna basyp kirip, janjal shyǵarǵany týraly beınejazbalar taraldy. Agenttik tilshisi máseleniń mán-jaıyn polıtsııa departamentinen naqtylady.
Vedomstvo Shý qalasyndaǵy kópsalaly aýdandyq aýrýhana ǵımaratyndaǵy janjalǵa qatysty quqyq qorǵaý organdaryna aryz, shaǵym túspegenin atap ótti.
- Shý aýdanyndaǵy kópsalaly aýdandyq aýrýhana ǵımaratyndaǵy janjalǵa qatysty quqyq qorǵaý organdaryna aryzdar men ótinishter túsken joq. Sonymen birge, polıtsııa qyzmetkerleri oqıǵaǵa qatysty tekserý jumystaryn júrgizip jatyr, - dep málim etti departamentten.
Eske salsaq, Shý aýrýhanasyna júkti bolyp túsken kelinshektiń denesin jubaıy jertóleden tapqany týraly aqparat taraǵan bolatyn.
Jambyl oblysynyń densaýlyq saqtaý basqarmasy osy fakti boıynsha jumys toby qurylǵanyn, Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń Jambyl oblysy boıynsha departamenti tekserý júrgizetinin málimdedi.
Sondaı-aq Jambyl oblystyq polıtsııa departamenti Qylmystyq kodekstiń 317-baby 2 jáne 3-bólikteri boıynsha (medıtsına qyzmetkeriniń kásibı mindetterin tıisinshe oryndamaýynan, abaısyzda adamnyń densaýlyǵyna aýyr zııan keltirý jáne ólimine ákep soqtyrý) sotqa deıingi tergeý júrgize bastady. Qajetti saraptama jasaý úshin máıit Tarazǵa jiberilgen.
Tekserý júrgizý kezeńinde Shý aýdanynyń aýdanaralyq ortalyq aýrýhanasynyń bas dárigeri men perzenthana bólimshesiniń meńgerýshisi atqaratyn laýazymdarynan shettetildi. Jambyl oblysy Densaýlyq saqtaý basqarmasy basshysynyń mindetin atqarýshy E. Musabaev tártiptik jaýapkershilikke tartylyp, qatań sógis shyǵaryldy. Medıtsınalyq kómek kórsetýdiń standarttary men qaǵıdalaryn buzýǵa jol bergen basqa adamdarǵa qatysty da jumystan shyǵarýǵa deıin tártiptik sıpattaǵy sharalar qabyldanatyny habarlandy.