Jambyl oblysynda qaıtarylǵan aktıvter esebinen aýyldyq dárigerlik ambýlatorııa ashyldy

TARAZ. KAZINFORM — Jambyl oblysynda qaıtarylǵan aktıvter esebinen 19 aýyz sýmen qamtamasyz etý jáne densaýlyq saqtaý nysanynyń qurylysy qarjylandyryldy. Bul týraly oblystyq prokýratýra málim etti.

17 maýsymda Jambyl oblysynyń prokýrory Nurǵalym Ábdirov Qordaı aýdany Úlken-Sulýtór aýylynda boı kótergen jańa dárigerlik ambýlatorııanyń ashylý saltanatyna qatysty.

— Prokýratýra organdary tarapynan zańsyz shyǵarylǵan aktıvterdi qaıtarý baǵytynda júrgizilip jatqan aýqymdy jumystar aıasynda bizdiń óńirde áleýmettik mańyzdy ınfraqurylymdy damytý boıynsha sharalar qabyldandy. Onyń jarqyn mysaly — medıtsınalyq kómekpen shalǵaı aýyldardy qamtamasyz etý bolyp tabylady, — dep oblys prokýrory Nurǵalym Ábdirov atap ótti.

Bul ambýlatorııa el boıynsha baǵdarlama aıasynda paıdalanýǵa berilgen alǵashqy nysandardyń biri. Onyń ashylýyna deıin aýyl turǵyndaryna 1959 jyly salynǵan eski ǵımaratta qyzmet kórsetilgen.

Aýdan ortalyǵy men Úlken-Sulýtór aýyly arasyndaǵy úlken qashyqtyqty eskere otyryp, jańa ambýlatorııa 1500-den astam turǵynǵa qajetti medıtsınalyq qyzmetterdi aýyldan shyqpaı-aq alýǵa múmkindik beredi.

Medıtsınalyq mekeme alǵashqy dárigerlik jáne dárigerge deıingi kómek kórsetý úshin qajetti zamanaýı medıtsınalyq qural-jabdyqtarmen, fızıoterapııa, ońaltý jáne EKG kabınetterimen jabdyqtalǵan.

Eske sala keteıik, buǵan deıin jospardan tys tekseris nátıjesinde Jambyl oblysynda 133 emshara kabıneti men 91 nysan óz erkimen jumysyn toqtatqanyn jazǵan edik.