Jambyl oblysynda qaıtarylǵan aktıvter esebinen 84 myń turǵyndy gazben qamtıtyn joba aıaqtalady
ASTANA. KAZINFORM – Memleket basshysynyń eldi gazdandyrý deńgeıin 80 paıyzǵa deıin jetkizý jónindegi tapsyrmasy aıasynda Jambyl oblysynda qaıtarylǵan aktıvter esebinen «Shý» avtomattandyrylǵan gaz taratý stansasynyń qurylysy aıaqtalady. Bul maqsatqa Arnaýly memlekettik qordan 2,9 mlrd teńge bólindi, dep habarlaıdy Úkimettiń baspasóz qyzmeti.
Jobany iske asyrý jylytý maýsymynda týyndaıtyn gaz tapshylyǵy máselesin sheshýge múmkindik beredi. Qazir Shý aýdany tabıǵı gazdy Shý qalasynan 100 shaqyrymnan astam qashyqtyqta ornalasqan «Qordaı» avtomattandyrylǵan gaz taratý stansasy arqyly alyp otyr. Alaıda onyń qýaty tutyný kóleminiń artýyna eseptelmegen.
Jańa stansany paıdalanýǵa berý turǵyn úı sektoryn, ortalyq qazandyqty jáne kásipkerlik nysandaryn kógildir otynmen úzdiksiz qamtamasyz etip, óńirdegi ınfraqurylymdyq shekteýlerdi joıady.
– Jalpy joba Shý jáne Moıynqum aýdandarynyń 84 myń turǵynyn turaqty gazben qamtamasyz etýge, sondaı-aq jańa abonentterge tehnıkalyq sharttar berýdi qaıta bastaýǵa múmkindik beredi, – delingen Úkimettiń baspasóz qyzmeti taratqan aqparatta.
Qazirgi ýaqytta qurylys alańynda 29 qondyrǵy men jabdyqtar jıyntyǵy ornatylyp, blokaralyq kommýnıkatsııalardy qosý jumystary júrgizilip jatyr.
Aıta keteıik, Qyzylorda oblysyndaǵy Aqjarma eldi mekeni turǵyndary tabıǵı gaz tutyna bastady.
