Jambyl oblysynda qansha sheteldik jumysshy júr — ákim jaýaby

ASTANA. KAZINFORM – Jambyl oblysynyń ákimi Erbol Qarashókeev óńirde qansha sheteldik maman jumys istep júrgenin jáne qandaı jaǵdaıda shetelden maman ákelinetinin túsindirdi.

Óńir ákiminiń aıtýynsha, qandaı ınvestor kelse de, olarǵa jergilikti turǵyndardy turaqty jumysqa alý jáne zaýyt salarda otandyq qurylys materıaldaryn paıdalaný talaby qoıylady. 

– Árıne keıbir jobalar birden qarqyn alyp úzdiksiz júzege asýy úshin ınvestorlar mamandardyń jetispeýshiligine baılanysty syrttan jumysshy tartady. Oǵan qaramastan, ózimizdiń mamandardy daıarlaý jóninde qazirden memorandým jasap jatyrmyz. Mysaly bizde 3 mln tonna júgeri óńdeıtin zamanaýı zaýyt salynyp jatyr. Qazaqstanda ondaı mamandar tapshy. Birden Jambyl óńirinen ınjenerler, hımıkter tabyla qoımaıdy. Sondyqtan oqý oryndarymen kelisip, 5 jylda iske qosylatyn iri jobalarǵa qansha jumysshy qajet, qandaı biliktilik bolýy kerek – kolledjder men oqý oryndarymen birlesip daıyndaýǵa kirisip kettik, – dep túsindirdi E. Qarashókeev. 

1 qarashadaǵy jaǵdaı boıynsha, Jambyl oblysynda 30 jumys berýshide 2618 shetel azamaty jumys isteıdi. Sonyń ishinde 19 kompanııada 935 qytaı azamaty bar. 
– Ákimdik tarapynan 735 sheteldikke ruqsat berilgen, qalǵan 1833 shetel mamany bul ruqsattan tys, ınvestıtsııalyq kelisimshart boıynsha ákelingen. ıAǵnı, iri ınvestıtsııalyq sharttarda Qazaqstannan tabylmaıtyn mamandardy ákelý jóninde tarmaq bar, – dedi óńir basshysy.

Shetel azamattary men jergilikti turǵyndar arasynda túsinispeýshiliktiń aldyn alý úshin iri 8 kásiporynmen is-sharalar algorıtmi ázirlengen. Tálimgerlik aıasynda 170-ke jýyq jergilikti turǵyn tájirıbeden ótse, 423 qazaqstandyq ınvestorlar uıymdastyrǵan biliktilik arttyrý kýrstarynan ótken. 
Aıta keteıik, 2029 jylǵa deıin Jambyl oblysynda 4,1 trln teńgege 62 ınvestıtsııalyq joba iske asyrylady jáne 8,3 myń jumys orny qurylady. Qant qyzylshasy, metall buıymdar, tyńaıtqyshtar, hımııalyq ónimder óndiretin iri zaýyttar ashylady.

Jambyl oblysy Qazaqstandy strategııalyq mańyzy bar hımııa ónimderimen 100% qamtamasyz etip otyr.