Jambyl oblysynda kanal tazalaý kólemi jospardan eki ese asty

Sharýalarǵa sýdy turaqty jetkizý úshin «Qazsýshar» RMK-nyń Jambyl oblystyq fılıaly ırrıgatsııa kanaldaryn mehanıkalyq ádispen tazalaý jumystaryn júrgizip jatyr. 2026 jyly 77,3 shaqyrym kanaldy tazalaý josparlanǵan bolatyn. Alaıda búginge deıin oryndalǵan jumystardyń naqty kólemi 160,3 shaqyrymǵa jetti. Bul bastapqy jospardyń 207,4 paıyzyna teń. Mundaı nátıjege, sonyń ishinde «Qazsýshar» RMK Jambyl oblystyq fılıalynyń materıaldyq-tehnıkalyq bazasyn nyǵaıtýdyń arqasynda qol jetkizildi. Eske salaıyq, byltyr fılıalǵa 55 arnaıy tehnıka berilgen bolatyn. Bul jumystardyń ónimdiligin arttyrýǵa, sondaı-aq sý sharýashylyǵy ınfraqurylymyn kútip ustaý jáne qalpyna keltirý múmkindikterin keńeıtýge jol ashty.

Aıta keteıik, jyl basynan beri «Qazsýshar» RMK fılıaldary jalpy uzyndyǵy 2043 shaqyrymnan astam kanaldy mehanıkalyq ádispen tazalady. Jyl sońyna deıin taǵy shamamen 200 shaqyrym kanaldy tazalaý josparlanyp otyr. Osylaısha, Qazaqstanda kanaldardy mehanıkalyq ádispen tazalaý qarqyny artyp keledi. Salystyrý úshin aıtsaq, 2025 jyly «Qazsýshar» RMK fılıaldary 1840 shaqyrym kanaldy tazalaǵan. Al 2024 jyly bul kórsetkish 1147,6 shaqyrym, 2023 jyly 678 shaqyrym boldy.

— Kanaldardy jańǵyrtý, sý resýrstaryn basqarýdyń zamanaýı tásilderin engizý jáne tehnıkalyq parkti jańartý sýdy tıimdi paıdalanýǵa ári sýarmaly eginshilikti turaqty damytýǵa negiz qalaıdy. Sýarý ınfraqurylymyn jańartý jumystary jalǵasady. Josparlanǵan jobalardy iske asyrý sý sharýashylyǵy nysandaryn kezeń-kezeńimen tıisti jaǵdaıǵa keltirýge, sýmen jabdyqtaý senimdiligin arttyrýǵa jáne sý resýrstaryn tıimdi paıdalanýdy qamtamasyz etýge múmkindik beredi, — dedi Sý resýrstary jáne ırrıgatsııa mınıstrligi Sý sharýashylyǵy ımarattaryn damytý departamentiniń dırektory Saǵı Útelov.

Budan buryn Jambylda únemdelgen qarajat esebinen 14 kanal betondalyp jatqanyn jazǵanbyz.