Jambyl oblysynda qamys pen qurǵaq shóp órtenip jatyr
ASTANA. KAZINFORM — Búgin óńir turǵyndaryn áleýmettik jelilerde taraǵan órt týraly habarlar alańdatty. Jeli qoldanýshylary oqıǵaǵa qatysty túrli boljam jasaı bastaǵanymen, tótenshe jaǵdaılar departamenti jaǵdaıǵa dereý túsinik berdi.
Vedomstvonyń málimetinshe, 19 qazanda Jambyl aýdanynyń Áýlıekól aýyly mańynda órt shyqqany týraly habar túsken. Onda qurǵaq shóp pen qamys órtengen.
Oqıǵa ornyna tótenshe jaǵdaılar departamentiniń órt sóndirýshileri men tehnıkasy jiberildi. Órtti sóndirýge basqa kúshter de, sonyń ishinde erikti órt sóndirý jasaǵy men «Azııa gaz qubyry» mekemesi jumyldyryldy.
Órt sóndirýshiler batpaqty jerde jumys isteýge májbúr. Qutqarýshylardyń aıtýynsha, aýmaqtyń osyndaı ereksheligi jalynmen kúresti qıyndatyp otyr. Resmı jaýap berilgen sátte órtti sóndirý jumystary áli aıaqtalmaǵan.
— Qazir órtti sóndirý jumystary jalǵasyp jatyr, — dep habarlady Jambyl oblysynyń tótenshe jaǵdaılar departamenti.
Vedomstvo ázirshe órt sharpyǵan aýmaqtyń kólemi men tutaný sebebin naqtylaǵan joq.
Eske salaıyq, buǵan deıin Atyraýda qamys alqaby órtengenin jazǵan edik.
