Jambyl oblysynda kámeletke tolmaǵandardyń isi jónindegi ınspektorlardyń jalaqysy kóteriledi
ASTANA. KAZINFORM – Jambyl oblysynyń ákimi Erbol Qarashókeev kámeletke tolmaǵandar isteri jónindegi ınspektorlardyń jalaqysy kóteriletinin habarlady.Ákimniń aıtýynsha, bul sheshim óńirdegi sýıtsıdtiń aldyn alý máseleleri aıasynda qabyldanǵan.
– Baızaq aýdanynda bir eldi mekende tórt sýıtsıd oqıǵasy boldy. Biz olardyń arasynda sebep-saldar baılanysy bar-joǵyn tekserip shyqtyq. Árqaısysy – jeke-dara jaǵdaı. Qazir biz tek Baızaq aýdanynda emes, barlyq aýdanda júıeli sharalar qabyldap jatyrmyz, – dedi ákim Ortalyq kommýnıkatsııalar qyzmetiniń kýlýarynda.
Sonymen birge, óńirde 60 myń adamnyń qatysýymen anonımdi saýalnama júrgizilgen. Uldar men qyzdarǵa bólek suraqtar ázirlenip, uldardan bopsalaý nemese qorqytý jaǵdaılary bar ma degen suraqtar qoıyldy.
Saýalnama nátıjesinde E. Qarashókeev atap ótkendeı, qaýip toby anyqtalyp, aqparat tıisti organdarǵa berilgen. Bul toptaǵy jasóspirimdermen maqsatty profılaktıkalyq jumys júrgizilmek.
– Saýalnama qorytyndysy boıynsha biz kámeletke tolmaǵandar isteri jónindegi ınspektorlarǵa qatysty sheshim qabyldadyq, biz olardyń jalaqysyn kóteremiz, – dedi ol.
Sonymen birge, ákim óńirde balalarmen jumys isteıtin qyzmetterdiń materıaldyq-tehnıkalyq bazasy kúsheıtilip jatqanyn habarlady.
– Biz kámeletke tolmaǵandardyń quqyqtaryn qorǵaý basqarmasyn qurǵan alǵashqy óńirlerdiń birimiz, – dep atap ótti E. Qarashókeev.
Sóz sońynda ákim sheneýnikter men mektep ókilderin problemalyq jaǵdaılardy jasyrmaı, ýaqytyly habarlaýǵa shaqyrdy.
Buǵan deıin Erbol Qarashókeev óńirde qansha sheteldik maman jumys istep júrgenin jáne qandaı jaǵdaıda shetelden maman ákelinetinin túsindirdi.
Sondaı-aq, 6 jasar bala óliminen keıin bas dáriger jumysynan bosatyldy.