Jambyl oblysynda alaıaqtyq boıynsha keńes beretin táýlik boıǵy telefon jelisi iske qosyldy

Endi táýliktiń kez kelgen ýaqytynda turǵyndar polıtsııanyń «Kıberpol» bólimine 8 778 733 4403 nómiri arqyly habarlasyp, keńes alyp, qońyraýdyń alaıaqtarǵa qatysy bar-joǵyn teksere alady. Eger uıaly telefonǵa qońyraý shalatyn múmkindik bolmasa jumys ýaqytynda habarlasýǵa arnalǵan 99-66-07 nómiri de jumys isteıdi.

Eshqaıda baryp, áýre bolýdyń nemese aryz jazyp, qujattar ótkizýdiń qajeti joq, barlyǵy jeńil, qarapaıym ári túsinikti, tek kúmándanyp tursańyz bolǵany — eshqandaı áreketke barmaı, aldymen tekserip alǵan jón.

Alǵashqy kúdik týyndaǵan jaǵdaıda:

• «kepildendirilgen tabys» nemese jyldam ınvestıtsııa usynsa;
• krıptovalıýtaǵa, treıdıngke, qandaı da bir platformaǵa ne startapqa aqsha salýǵa úgittese;
• «bank qyzmetkeri» shotyńyz buǵattalatynyn aıtyp qorqytyp, SMS-kodty surasa;
• ózin polıtsııa ne prokýratýra qyzmetkeri retinde tanystyryp, sheshimdi jedel qabyldaýǵa qysym jasasa;
• tanysyńyz aıaq astynan shuǵyl aqsha surap, biraq habarlamalary kúmán týdyrsa;
• silteme jiberip, onyń bankke nemese memlekettik organǵa tıesili shynaıy saıt ekenine kúmándansańyz;
• qashyqtan jumys usynǵanymen, aldymen qoljetimdilik úshin aqy tóleýdi talap etse birden polıtsııaǵa júginińiz.

Tipti óz balańyz qońyraý shalyp, qıyn jaǵdaıǵa tap bolǵanyn aıtsa da, asyǵys sheshim qabyldamańyz — qyzmetkerlerge habarlasyp, aqparattyń rastyǵyn teksertip alyńyz. Al shyn máninde kómek qajet bolsa, jedel sharalar qabyldanady.

Habarlamalardy «CyberShekteuTaraz» Telegram-boty arqyly da joldaýǵa bolady.

Qazirgi ýaqytta shamamen 500-ge jýyq habarlama kelip túsken, olar boıynsha buǵattaý sharalary júrgizilip jatyr.

Mamandardyń aıtýynsha, búginde alaıaqtar barǵan saıyn aılaly tásilder qoldanýda: bankterdiń shynaıy logotıpterin paıdalanady, saıttardy kóshirip jasaıdy jáne psıhologııalyq qysym kórsetedi — asyqtyrady, qorqytady.

Tájirıbe kórsetkendeı, zardap shekkenderdiń kópshiligi bastapqyda kúmándanǵandaryn moıyndaıdy, alaıda alaıaqtar olardy sendirip úlgergen. Endi bir ǵana qońyraý nemese habarlama arqyly qarajatyńyzdy, júıkeńizdi jáne ýaqytyńyzdy saqtap qalýǵa bolady.

Aıta keteıik, Túrkistan oblysynda 125 mln teńgeden astam zalal keltirgen toptyń qylmysy áshkerelendi.

Buǵan deıin antıfrod-ortalyǵynyń mamandary alaıaqtyq áreketterdiń 67 paıyzy jalǵan ınvestıtsııalar men onlaın-dúkenderge qatysty ekenin aıtty.