Jambyl oblysynda ınternet alaıaqtyq eki esege ósken
TARAZ. KAZINFORM — Jambyl oblysynda byltyrǵy jyldyń 10 aıynda 213 kıberqylmys tirkelse, bıyl bul kórsetkish 644-ke jetti.
Polıtsııa qyzmetkerleri onlaın-alaıaqtarmen baılanysy bar 2 242 kúdikti bank shottaryn buǵattaǵanyn habarlady.
Jambyl oblysynda ınternet alaıaqtyqqa qatysty kúdik týyndasa dereý 99-66-07 telefon nómirine habarlasý qajet.
Sońǵy jyldary ınternet alaıaqtyq máselesiniń ózekti bolǵany sonsha, qańtar aıynda aımaqta kıberqylmyspen kúres basqarmasy quryldy. Basqarma basshysy Ýálıhan Aǵybaev qylmys sanynyń eki ese óskenin habarlady.
Vedomstvonyń málimetinshe, Jambyl oblysynda alaıaqtar kóbinese ózin bank nemese quqyq qorǵaý organynyń qyzmetkeri retinde tanystyrady. Qazirgi tańda 156 adam osy shema arqyly alaıaqtyqtardyń qurbany bolǵan. Ózderin tehnıkalyq buıymdar dúkeniniń qyzmetkeri retinde tanystyryp nemese Instagram jarnamasy arqyly jumysqa ornalasýdy usynǵan alaıaqtarǵa qatysty 184 jaǵdaı tirkeldi. Sonymen qatar 119 turǵyn jeke málimetterin alaıaqqa berip, olardyń atyna onlaın nesıe rásimdelgen.
— Droper (urlanǵan aqshany alýǵa kómektesken adam) QR Qylmystyq kodeksiniń 28-babynyń 5-bóligi boıynsha sybaılas retinde qylmystyq jaýapkershilikke tartylady. Jábirlenýshiler olarǵa keltirilgen shyǵyndy óndirý týraly talap qoıýǵa quqyly», — dep atap ótti Ýálıhan Aǵybaev.
2025 jyldyń 16 qyrkúıeginen bastap QR Qylmystyq kodeksine jańa 232-1-bap engizildi. Ol bank shotyna, tólem nemese sáıkestendirý quraldaryn zańsyz usynǵany, aýdarǵany nemese olarǵa qol jetkizgeni úshin, sondaı-aq zańsyz tólemder men aýdarymdar úshin jaýapkershilikti kózdeıdi. Jańa bap boıynsha qylmystyń aýyrlyǵyna qaraı múlki tárkilenip, 7 jylǵa deıin bas bostandyǵynan aıyrý jazasy qarastyrylǵan.
Polıtseılerdiń túsindirýinshe, quqyq buzýshylyqty alǵash ret jasaǵan jáne ol týraly óz erkimen habarlaǵan, sondaı-aq ony ashýǵa nemese jolyn kesýge belsendi túrde kómektesken adam qylmystyq jaýapkershilikten bosatylady. Biraq qylmystyń basqa belgileri bolmaýy qajet.
Tártip saqshylary alaıaqtarǵa qatysty qarapaıym qaýipsizdik erejelerin taǵy da eske saldy.
— Bank kartasynyń nómiri nemese CVV kody sııaqty qupııa aqparatty eshkimmen bólispeńiz. Daýys berýdi usynatyn sııaqty kúdikti siltemelerdi ashpańyz. Eger sizge «jyldam aqsha» nemese «úlken utys» usynylsa, kúmándaný qajet. Sebebi bul alaıaqtardyń aılasy, — dep qosty Ýálıhan Aǵybaev.
Qazir aımaqta CyberShekteuTaraz Telegram boty jumys isteıdi. Qazirdiń ózinde onda alaıaqtyqqa qatysty 500-ge jýyq habarlama jarııalanǵan. Turǵyndar botty qaýipti siltemeler, alaıaqtardyń telefon nómirleri jáne áleýmettik jeliler men bazardaǵy jalǵan jarnamalar týraly habarlaý úshin paıdalana alady.
Aıta keteıik, Antı Call-ortalyqtar 70 myńnan astam alaıaqtyq qońyraýdy toqtatqan.