Jambyl oblysynda gaz qubyry jarylyp, 1 myńǵa jýyq úı jylýsyz qaldy

Jambyl oblysynda tún jarymynda magıstraldy gaz qubyry jarylyp, 5 eldi mekendegi 980 úı jylýsyz qaldy, dep habarlaıdy Kazinform.

Atap aıtqanda, Jambyl aýdanyndaǵy Qyzylqaınar, Jasórken, Jalpaqtóbe, Qyzyldıhan, Grodekovo aýyldarynyń turǵyndary gazsyz otyr.

Oǵan qosa osy eldi mekenderdegi 8 áleýmettik nysan da jylýdan ajyrap qaldy.

Apat Grodekovo aýylynda túngi 22:10 shamasynda bolǵan.

Aldyn ala boljam boıynsha, qubyr qysym áserinen jarylǵan bolýy múmkin.

Qazir sala mamandary 20 metrden asatyn qubyr bóligin jalǵap jatyr.

Apatqa baılanysty aımaqta arnaıy shtab quryldy.

«Jóndeý jumystary shamamen 4-5 saǵat júrgiziledi degen oıdamyz. 10 jerden dánekerleý, jalǵaý jumystaryn júrgizý kerek. Áleýmettik nysandardan 4 mektep, 2 balabaqsha, 2 medıtsınalyq ǵımarat jylýsyz tur. Oǵan baılanysty janar jaǵarmaımen jumys isteıtin arnaıy qurylǵy nasostarmen olardyń jylý júıesin aınaldyryp, qatyp qalmaý úshin áreket jasalyp jatyr», — deıdi Jambyl oblysy ákiminiń orynbasary Qanatbek Mádibekov.