Jambyl oblysynda «EýroHım» kúkirt qyshqyly zaýyty iske qosyldy
TARAZ. KAZINFORM — Jańa kásiporynnyń óndiristik qýaty jylyna 800 myń tonna kúkirt qyshqylyn óndirýge jetedi.
Ónerkásip jáne qurylys mınıstri Ersaıyn Naǵaspaev Jambyl oblysynda «EýroHım» kúkirt qyshqyly zaýytyn iske qosý rásimine qatysty.
Bul ónim aýyl sharýashylyǵy, energetıka, metallýrgııa, mashına jasaý jáne basqa da salalarda keńinen qoldanylady.
Zaýyttyń ashylýy nátıjesinde 330 jańa jumys orny quryldy. Atalǵan óndiris orny jylyna 1 mln tonnaǵa deıin mıneraldy tyńaıtqyshtar men ónerkásiptik ónim shyǵarýǵa múmkindik beretin joǵary tehnologııalyq hımııa klasterin qurýǵa baǵyttalǵan aýqymdy ındýstrııalyq jobanyń bir bóligi sanalady. «EýroHım» halyqaralyq kompanııasynyń bul jobaǵa salǵan ınvestıtsııasynyń jalpy kólemi 1 mlrd AQSh dollary.
— Joba Memleket basshysynyń elimizdiń ekonomıkalyq derbestigin qamtamasyz etý jáne óńdeý ónerkásibin damytý, ekonomıkany ártaraptandyrý boıynsha alǵa qoıǵan strategııalyq mindetterin oryndaýǵa qatysty atqarylyp jatqan jumystardyń bir mysaly. Joǵary tehnologııalyq óndiristerdi iske qosý — eki el arasyndaǵy ónerkásiptik yntymaqtastyq pen strategııalyq áriptestiktiń nyǵaıýynyń jarqyn úlgisi. Joba tolyq qýatyna shyqqan kezde Qazaqstan ekonomıkasynyń damýyna eleýli úles qosatynyna senimdimin, — dep atap ótti Ersaıyn Naǵaspaev.
Hımııa kesheni jobasynyń úshinshi kezeńi aıasynda búginde tıisti jumystardyń 70 paıyzdan astamy oryndalǵan. Jobany tolyq qýatqa shyǵarý kelesi jyldyń basyna josparlanyp otyr. Barlyq óndiristik jeliler iske qosylǵannan keıin hımııa ónerkásibi men agroónerkásip kesheniniń damýyna serpin beredi, sondaı-aq 1200 turaqty jumys orny ashylady.
Prezıdent tapsyrmalaryn oryndaý aıasynda Ónerkásip jáne qurylys mınıstrligi ekonomıkany ártaraptandyrý jáne basym baǵyttarǵa ınvestıtsııa tartý boıynsha júıeli jumys júrgizip keledi. Sonyń nátıjesinde sońǵy eki jyl boıy óńdeý ónerkásibinde turaqty ósim saqtalyp otyr. Bul oń úrdis bıylǵy jyldyń alǵashqy tórt aıynyń qorytyndysy boıynsha da baıqaldy. Hımııa ónerkásibinde shamamen 20 paıyzdyq ósimge qol jetkizildi. Elimizde polıpropılen, kúkirt qyshqyly, mıneraldy tyńaıtqyshtar, lak-boıaý jáne basqa da taýarlardy óndirýkólemi jyl saıyn artyp keledi.
Anyqtama: «EýroHım» (EuroChem Group AG) — negizgi óndiristik aktıvteri Reseı, Belgııa, Lıtva jáne Qytaıda ornalasqan halyqaralyq hımııa kompanııasy. Kompanııa mıneraldy tyńaıtqysh óndirý salasynda álemdegi alǵashqy bestiktiń qataryna kiredi.
Aıta ketelik Atyraýda plastık qaldyqtardy qaıta óńdeıtin zaýyt ashylatyny týraly jazǵan edik.
