Jambyl oblysynda esirtkini zańsyz saqtap, tasymaldaǵan áke men balasy sottaldy

TARAZ. KAZINFORM — Ákesi men balasy 200 kg jýyq esirtki zatyn zańsyz saqtap, tasymaldaǵany jáne ótkizgeni úshin sottaldy. Bul týraly oblystyq prokýratýra málim etti.

— 2024 jyldyń kúz aılarynda «Ý» jáne «T» esimdi tulǵalar asa iri mólsherdegi «gashısh» jáne «keptirilgen marıhýana» esirtki zattaryn ótkizý maqsatynda jınap, Jambyl oblysy, T.Rysqulov aýdanynda ornalasqan sharýa qojalyqqa jasyrǵan, — delingen habarlamada.

UQKD-niń qyzmetkerleri júrgizgen jedel izdestirý-sharalary nátıjesinde «Ý» jáne «T» esimdi tulǵalar 12,7 kg asa iri mólsherdegi «gashısh» esirtki zatyn 1 mln teńgege ótkizý barysynda quryqtaldy.

— Sonymen qatar atalǵan tulǵalarǵa tıesili sharýa qojalyqtan ósimdik tárizdes zattar salynǵan 13 dana qaptar tárkilenip, ishinen jalpy salmaǵy 185 kg «keptirilgen marıhýana» esirtki zaty tabylyp alynǵan, — dep jazdy quqyq qorǵaý organynan. 

Jambyl oblysynyń qylmystyq isteri jónindegi mamandandyrylǵan aýdanaralyq sotynyń 23.07.2025 jylǵy úkimimen ákesi men balasy adamdar tobynyń aldyn ala sóz baılasýymen asa iri mólsherdegi esirtki zatyn ótkizý maqsatynda zańsyz saqtaǵany, tasymaldaǵany jáne ótkizgeni úshin QK 297-babynyń 3-bóligi 1,3 -tarmaqtarymen kináli dep tanylyp, 7 jylǵa bas bostandyqtarynan aıyryldy.

Úkim zańdy kúshine engen joq.

Buǵan deıin Jambyl oblysynda iri kólemde esirtki saqtaǵan turǵyn ustalǵan edi. Ol 3 keliden astam keptirilgen marıhýanany saqtaǵan bolatyn.