Jambyl oblysynda esirtki tasymaldaǵan eki kúdikti ustaldy

ASTANA. KAZINFORM — Shý qalasynyń polıtseıleri 50 keliden astam marıhýana tasymaldaǵan turǵyndardy ustady, dep habarlaıdy Polisia.kz.

— QR ІІM esirtki qylmysyna qarsy is-qımyl komıteti, Jambyl oblysy polıtsııa departamentiniń esirtki qylmysyna qarsy is-qımyl basqarmasy jáne Ulttyq ulannyń № 6506 «Búrkit» áskerı bóliminiń áskerı qyzmetshileri birlesip júrgizgen is-shara barysynda 50 keliden astam esirtki zatyn tasymaldanǵan avtokólik toqtatyldy, — delingen aqparatta.

Arnaıy operatsııa Shý qalasyndaǵy Sátbaev kóshesinde júrgizildi. Polıtseıler Mazda avtokóligin toqtatyp, tekserý kezinde artqy oryndyǵynan úsh qap, al júksalǵyshynan taǵy eki qap tabyldy. Qaptardyń ishinde ózine tán ıisi bar ósimdik tektes zat bolǵan. 

Saraptama qorytyndysyna sáıkes, tárkilengen zat — keptirilgen marıhýana esirtkisi ekeni anyqtaldy. Jalpy salmaǵy 51 keli. 

Ustaý sharasy oblystyq prokýratýranyń úılestirýimen júrgizildi.

Aıta keteıik, elordada esirtki qylmysyna qatysy bar eki adam qamaýǵa alyndy.