Jambyl oblysynda esirtki satpaq bolǵan turǵyn ustaldy
ASTANA. KAZINFORM — Jambyl oblysynda polıtseıler 24 keliden astam marıhýananyń taratylýyna jol bermedi, dep habarlaıdy Polisia.kz.
«Qarasora — 2026» jedel-profılaktıkalyq is-sharasy aıasynda Jambyl oblysynyń polıtsııa departamenti esirtki qylmysyna qarsy is-qımyl basqarmasynyń qyzmetkerleri men Ulttyq ulannyń № 6506 áskerı bóliminiń «Búrkit» arnaıy maqsattaǵy jasaǵy asa iri mólsherdegi esirtki zattaryn ótkizý maqsatynda zańsyz saqtaý dereginiń jolyn kesti.
Shý aýdanynyń Tasótkel aýyly mańyndaǵy qumdy alqapta polıtseıler 60 jastaǵy jergilikti turǵyndy anyqtap, odan esirtkige uqsas zat tapty.
Oqıǵa ornyndaǵy tergeý áreketteri barysynda oraq, qolǵap, sondaı-aq ózine tán ıisi bar jasyl tústi ósimdik tektes zat salynǵan 4 orama tárkilendi.
Saraptama qorytyndysyna sáıkes tárkilengen zattyń jalpy salmaǵy 24 keliden asatyn marıhýana ekeni anyqtaldy.
Tergeý barysynda polıtsııa qyzmetkerleri er adamnyń zańsyz túrde jabaıy ósetin qarasorany jınap, ony keptirip, satýdy josparlaǵanyn anyqtady.
Atalǵan derek boıynsha sotqa deıingi tergep-tekserý bastaldy. Kúdiktige qatysty sottyń sanktsııasymen kúzetpen ustaý túrindegi bultartpaý sharasy qoldanyldy.
