Jambyl oblysynda esirtki ósirgen 61 jastaǵy turǵyn ustaldy

TARAZ. KAZINFORM – Jambyl oblysynyń polıtsııa qyzmetkerleri «Qarasora-2024» jedel-profılaktıkalyq is-sharasy barysynda Jambyl aýdanynda esirtkini zańsyz ósirgen turǵyndy ustady. 

61 jastaǵy kúdikti esirtkiniń qarasora, kóknár sorttaryn ósirgen. Onyń baqshasynan jalpy salmaǵy 1520 túp kóknár ósimdigi, 37 kannabıs butasy anyqtaldy. Nátıjesinde 54 keli kóknár, 53 kg marıhýana, barlyǵy 100 keliden asatyn esirtki tárkilendi.

«Ustalǵan adam óz kinásin tolyǵymen moıyndady. Jambyl APB ýaqytsha ustaý ızolıatoryna qamaýǵa alyndy. «Qarasora-2024» is-sharasy aıasynda esirtkini zańsyz ósirýdi, tranzıtteýdi, alqaptaryn jáne esirtki zerthanasyn joıýdy, uıymdasqan qylmystyq toptardy anyqtaýǵa jáne jolyn kesýge baǵyttalǵan is-sharalar odan ári jalǵasatyn bolady», – dedi Polıtsııa departamenti Esirtki qylmysyna qarsy is-qımyl basqarmasynyń bastyǵy Álim Bajyqbaev.

Buǵan deıin Tarazda orta jastaǵy áıelden 42 keli esirtki tárkilengenin jazǵan bolatynbyz.