AQSh Izraıldi Gazadaǵy gýmanıtarlyq jaǵdaıdy jaqsartýǵa shaqyrdy
ASTANA. KAZINFORM – AQSh bıligi Izraıldi eger bılik Gaza sektoryndaǵy gýmanıtarlyq jaǵdaıdy jaqsartýǵa baǵyttalǵan sharalar qabyldamasa jáne 30 kún ishinde anklavqa gýmanıtarlyq kómektiń jetkizilýin qamtamasyz etpese, Izraılge áskerı qoldaýdy qysqartýy múmkin ekenin eskertti, dep habarlaıdy VVS.
Bul eskertý HAMAS-tyń Izraılge buryn-sońdy bolmaǵan shabýylynan keıin bir jyl ótken soń jasaldy.
Ótken jeksenbide Izraıl Qorǵanys mınıstri Ioav Galantqa joldanǵan hatta AQSh Memlekettik hatshysy Entonı Blınken men Pentagon basshysy Lloıd Ostın Gazaǵa kórsetiletin kómektiń kólemin ulǵaıtyp, osy ýaqytqa deıin jetkizilip kelgen deńgeıge deıin jetkizýdi qamtamasyz etý úshin naqty sharalar qabyldaýǵa shaqyrdy, dep habarlady Memlekettik departament ókili Mettıý Mıller.
«Qyrkúıek aıynda Gazaǵa kelgen kómektiń kólemi ótken jyldyń eń azy boldy. Gýmanıtarlyq jaǵdaıdy qalpyna keltirý úshin Izraıl búginnen bastap jáne 30 kún ishinde naqty sharalar qabyldaýy kerek», - delingen hat mátininde. Hat týraly birinshi bolyp Axios basylymy habarlady.
Onda sondaı-aq amerıkalyq kómekti jetkizýge kedergi keltiretin elderge áskerı kómek kórsetýge tyıym salatyn AQSh zańdarynyń tizimi keltirilgen. AQSh Memlekettik departamenti bul hattyń qupııa bolǵanyn málimdedi.
