Jambyl oblysynda eki aıda 27 jasóspirim júktiligi tirkeldi

TARAZ. KAZINFORM – 2026 jyldyń alǵashqy eki aıynda Jambyl oblysynda jasóspirimder arasynda 27 júktilik jaǵdaıy tirkeldi. Bul týraly Kazinform tilshisine oblystyq densaýlyq saqtaý basqarmasy málim etti.

Ana men bala densaýlyǵyn qorǵaý bóliminiń basshysy Aıjan Terlikbaevanyń aıtýynsha, tirkelgen jaǵdaılardyń ishinde 16 jasqa tolmaǵan qyzdar joq.

– 2026 jyldyń qańtar-aqpan aılarynda óńirde jasóspirimder arasynda 27 júktilik faktisi tirkeldi. Ótken jyldyń osy kezeńimen salystyrǵanda kórsetkish tómendedi. 2025 jyly osy ýaqytta 44 jaǵdaı bolǵan, – dedi ol.

Mamandardyń málimetinshe, júktiliktiń basym bóligi 16-17 jastaǵy qyzdar arasynda kezdesedi. Bul sanatta 23 jaǵdaı tirkelgen. Taǵy 4 jaǵdaı 18-19 jastaǵy, resmı nekede turǵan qyzdarǵa qatysty.

Taldaý nátıjesi boıynsha, júkti bolǵandardyń edáýir bóligi – kolledj stýdentteri. Atap aıtqanda, 12 qyz orta arnaýly bilim alyp jatyr, bireýi joǵary oqý ornynda oqıdy, taǵy biri keshki mektepte bilim alady. Jeti qyz mektep bitirgennen keıin esh jerde oqymaıdy.

Sonymen qatar eki jaǵdaı óńirge basqa qalalardan kelgen qyzdar arasynda tirkelgen.

Densaýlyq saqtaý basqarmasynyń málimetinshe, oblysta jastarǵa arnalǵan segiz densaýlyq ortalyǵy jumys isteıdi. Onda jasóspirimder psıholog, gınekolog jáne basqa da mamandardan anonım túrde keńes ala alady.

Sondaı-aq jyl saıyn jasóspirimderge skrınıng júrgizilip, dárister, trenıngter jáne ata-analarmen kezdesýler uıymdastyrylady.

– Erte júktilik anyqtalǵan jaǵdaıda árbir jaǵdaı jeke qaralady. Dárigerler, psıhologtar jáne áleýmettik qyzmetter birge jumys isteıdi, – dedi Aıjan Terlikbaeva.

Aıta keteıik, Jambyl oblysynda múmkindigi shekteýli ár tórtinshi bala bilim almaı otyr.