Jambyl oblysynda eki aptada qyzylshanyń 191 jaǵdaıy tirkeldi
ASTANA. KAZINFORM – Jambyl oblysynda sońǵy eki apta ishinde qyzylshanyń 191 jaǵdaıy anyqtaldy. Onyń 139-y bes jasqa deıingi balalarǵa tıesili. Aýrýdyń negizgi oshaǵy Taraz qalasy bolyp otyr, munda 155 jaǵdaı tirkelgen.
Jambyl oblysynyń sanıtarlyq-epıdemıologııalyq baqylaý departamentiniń málimetinshe, 2026 jylǵy 1 qańtardan bastap óńirde qyzylsha aýrýynyń ósýi baıqalady. Anyqtalǵan jaǵdaılardyń 80 paıyzdan astamy 14 jasqa deıingi balalar arasynda tirkelgen.
Vedomstvo derekterine sáıkes, syrqattanǵandardyń 43-i bir jasqa tolmaǵan balalar, 42 jaǵdaı bir jastaǵy balalar arasynda, taǵy 54 jaǵdaı eki jastan bes jasqa deıingi topta anyqtalǵan. Aýrýǵa shaldyqqandardyń negizgi bóligi Taraz qalasynda tirkelgen, bul jalpy kórsetkishtiń 81 paıyzyn quraıdy. Qalǵan aýdandarda 1-14 jaǵdaı aralyǵynda anyqtalǵan.
– Aýrý juqtyrǵandardyń basym bóligi vaktsına salynbaǵan adamdar. Onyń negizgi sebepteri profılaktıkalyq ekpeden bas tartý (33 paıyz), medıtsınalyq qarsy kórsetilimder (15 paıyz) jáne ekpe jasyna jetpeý (22 paıyz), – dedi departament basshysynyń orynbasary Neıla Múlikova.
Qyzylsha joǵary juqpalylyǵymen erekshelenetin jedel vırýstyq ınfektsııa bolyp tabylady. Aýrý aýa-tamshy jolymen taralady jáne adamdar kóp jınalatyn oryndarda qysqa ýaqyttyq baılanys kezinde de juǵýy múmkin.
– Bir naýqas ımmýnıteti joq 20 adamǵa deıin juqtyra alady. Vırýs jabyq ǵımaratta bir saǵatqa deıin saqtalady, sondyqtan naýqas ketkennen keıin de juqtyrý qaýpi bar, – dep túsindirdi maman.
Dárigerlerdiń aıtýynsha, qyzylsha dene qyzýynyń 38-40 gradýsqa deıin kóterilýinen bastalyp, tumaý, jótel, konıýnktıvıt jáne qatty álsizdikpen qatar júredi. Birneshe kúnnen keıin bórtpe paıda bolyp, basynan bastap denege jáne aıaq-qolǵa taralady. Mamandar eresekterdiń qyzylshany balalarǵa qaraǵanda aýyr ótkeretinin atap ótti.
Aýrýdyń qaýiptiligi asqynýlarmen baılanysty. Olardyń qatarynda ókpe qabynýy, qurysý, ortalyq júıke júıesiniń zaqymdanýy, onyń ishinde entsefalıt bar. Sırek jaǵdaılarda qyzylsha aýyr formaǵa – qyzylshalyq panentsefalıtke ákelýi múmkin, sondaı-aq ımmýnıtettiń uzaq ýaqyt álsireýine sebep bolady.
Qyzylshaǵa qarsy arnaıy em joq. Qorǵanýdyń jalǵyz tıimdi joly – vaktsınatsııa. Ulttyq egý kúntizbesine sáıkes, josparly ımmýndaý 1 jasta jáne 6 jasta júrgiziledi. Aýrýdyń ósýine baılanysty 2025 jylǵy jeltoqsannan bastap Jambyl oblysynda qosymsha jospardan tys vaktsınatsııa júrgizilip jatyr.
– Qazirgi ýaqytta 9-10 aılyq egilmegen balalarǵa, sondaı-aq 2-18 jas aralyǵyndaǵy balalar men jasóspirimderge ekpe salynýda. Búgingi kúnge deıin qyzylshaǵa qarsy vaktsınany shamamen 4 myń bala aldy, – dedi departament basshysynyń orynbasary.
Medıtsına qyzmetkerleri ekpe salynǵandardyń 97-98 paıyzynda turaqty ımmýnıtet qalyptasatynyn, onyń 20-25 jylǵa deıin saqtalatynyn aıtyp, ata-analardy profılaktıkalyq ekpeden bas tartpaýǵa shaqyrady.
Eske sala keteıik, ótken jyly Batys Qazaqstanda 1 300-den astam adam qyzylshamen aýyrǵan.