Jambyl oblysynda donorlar jetispeıdi: júzdegen naýqas kezekte tur
ASTANA. KAZINFORM – Jambyl oblysynda donorlyq organdar tapshylyǵy saldarynan naýqastar jyldar boıy transplantatsııa kezeginde tur.
Mamandardyń aıtýynsha, donor jetispeýshiligi máselesi búkil Qazaqstan boıynsha ózekti kúıinde qalyp otyr. Oblystyq transplantatsııa úılestirýshisi, densaýlyq saqtaý basqarmasynyń shtattan tys bas nefrology Aıagóz Baımuratovanyń málimetinshe, sońǵy bes jylda elimizde 1005 transplantatsııa jasalǵan. Alaıda operatsııalardyń basym bóligi – 92,1%-y tiri donorlar esebinen júzege asqan.
Al qaıtys bolǵannan keıingi donorlyqtyń úlesi nebári 7,9% ǵana.
Jambyl oblysynda da jaǵdaı osyǵan uqsas. Qazirgi tańda 137 adam transplantatsııa kezeginde tur. Olardyń 122-si, onyń ishinde bes bala búırek aýystyrýǵa muqtaj. Bul óńirdegi baǵdarlamalyq gemodıalızdegi naýqastar sanynyń kóptigimen baılanysty, búgingi kúni olardyń sany 439 adamǵa jetken.
Sondaı-aq 8 adamǵa baýyr, 7 adamǵa júrek transplantatsııasy qajet.
Júrgizilip jatqan jumystarǵa qaramastan, júıe áli de týystyq donorlarǵa táýeldi. 2024 jyly óńirde 25 búırek jáne 5 baýyr transplantatsııasy jasalsa, onyń tek bireýi ǵana máıittik donorlyq esebinen júzege asqan.
2025 jyldyń segiz aıynda jasalǵan 7 búırek transplantatsııasynyń barlyǵy tiri donorlardan alynǵan.
Mamandardyń aıtýynsha, máıittik donorlyqtyń damýy óte baıaý júrip jatyr. 2014-2017 jyldary mundaı nebári tórt jaǵdaı tirkelse, keıingi jyldary tek eki jaǵdaı (2023 jáne 2025 jyldary) ǵana bolǵan.
Sarapshylar bul máseleniń tek medıtsınaǵa emes, qoǵamdaǵy kózqarasqa da baılanysty ekenin atap ótedi. Senimniń tómendigi, túrli mıfter men etıkalyq kúmándar júıeniń damýyn tejep otyr.
Osyǵan baılanysty mamandar aqparattyq-túsindirý jumystaryn kúsheıtýdi basty baǵyt retinde qarastyrady. Dárigerler, din ókilderi men buqaralyq aqparat quraldary qoǵamda máıittik donorlyqqa oń kózqaras qalyptastyrýda mańyzdy ról atqarýy tıis. Sebebi bir ǵana sheshim birneshe adamnyń ómirin saqtap qalýy múmkin.
Buǵan deıin Qazaqstan boıynsha shamamen 5 myńǵa jýyq adam organ transplantatsııasyn kútip otyrǵany habarlanǵan.
