Jambyl oblysynda densaýlyq saqtaý nysandary 40,3% tozǵan
Jambyl oblysynyń emdeý mekemeleri medıtsınalyq tehnıkalarmen 96% qamtamasyz etilgen. Bul týraly óńir ákimi Erbol Qarashókeev aıtty, dep habarlaıdy Kazinform.
«Oblysta 391 densaýlyq saqtaý nysany qyzmet kórsetýde jáne 24 nysannyń qurylysy júrip jatyr, onyń 10-y «Aýyldyq densaýlyq saqtaýdy jańǵyrtý» ulttyq jobasy aıasynda qolǵa alynǵan. Búginge 6 nysan paıdalanýǵa berildi. Іri nysandardyń biri – Taraz qalasyndaǵy oblystyq onkologııalyq dıspanser (200 tósek-oryn), Shý aýdanyndaǵy balalarǵa arnalǵan ońaltý ortalyǵy (48 tósek-oryn) bar», - dedi Erbol Qarashókeev Ortalyq kommýnıkatsııalar qyzmetinde.
Onyń aıtýynsha, 2023 jyldyń sońyna deıin taǵy 13 densaýlyq saqtaý nysanyn paıdalanýǵa berý josparlanýda. Qalǵan 5 nysan 2024 jyly engizilmek. 9 nysan kúrdeli jóndeýden ótti, 2 nysanda jumystar júrgizilýde.
«19 aýrýhana men 3 emhanaǵa medıtsınalyq qural-jabdyqtar jáne 14 aýrýhana men 3 emhanaǵa 40 jedel járdem kóligi satyp alyndy. Nátıjesinde, emdeý mekemeleriniń medıtsınalyq tehnıkalarmen qamtamasyz etilý deńgeıi 91-den 96%-ǵa jetkiziledi. 2024 jylǵy josparǵa toqtalsam, «Aýyldyq densaýlyq saqtaýdy jańǵyrtý» jobasy aıasynda 20 medıtsınalyq-sanıtarlyq nysan qurylysy josparlanýda. Orta merzimdi perspektıvada Baızaq, Qordaı, Jýaly aýdandarynda 3 iri aýdandyq aýrýhananyń qurylysyn salý, Merki, Shý jáne Talas aýdandarynda 3 aýdanaralyq kópsalaly aýrýhanalardy qaıta jańǵyrtý josparlanýda», - dep túsindirdi oblys basshysy.
Nátıjesinde oblystaǵy densaýlyq saqtaý nysandarynyń tozýy 40,3%-dan 38%-ǵa deıin tómendeıdi.
Buǵan deıin Erbol Qarashókeev óńirde elektr energııasy jetispeı jatqanda nelikten polıtsııa patrýline elektromobıl alynǵanyn túsindirgen edi.
