Jambyl oblysynda dárihana jelisi arqyly psıhotroptyq zat taratqan top ustaldy

TARAZ. KAZINFORM – Jambyl oblysynda psıhotroptyq zattardy satýmen aınalysqan uıymdasqan toptyń áreketi toqtatyldy, dep habarlaıdy Polisia.kz.

«Zań men tártip» qaǵıdatyn iske asyrý aıasynda prokýratýranyń úılestirýimen esirtki qylmystaryna qarsy kúres, uıymdasqan qylmysqa qarsy kúres jáne ishki qaýipsizdik bólimsheleri uzaq ýaqyt boıy Almatydan Jambyl oblysyna psıhotroptyq zattardy zańsyz tasymaldap, ótkizýmen aınalysqan toptyń qyzmetin anyqtaýǵa baǵyttalǵan arnaıy operatsııa júrgizdi.

Nátıjesinde Taraz qalasyndaǵy birqatar dárihanadan 364 ampýla kúshti áser etetin tramadol, 1800-den astam tropıkamıd, somnol jáne dımedrol tabletkalary, sondaı-aq 17 gramm oksıvıd esirtki zaty tárkilendi.

- Operatsııa barysynda tórt kúdikti ustaldy. Tergeý málimetinshe, olardyń biri – Tarazdyń 59 jastaǵy turǵyny – 2023 jyldan 2025 jylǵa deıin tyıym salynǵan preparattardy jetkizý men taratýdy uıymdastyryp, ony dárihana bıznesi retinde jasyryp kelgen, - dep jazylǵan aqparatta.

Ustalǵandar kinásin moıyndap, ýaqytsha ustaý ızolıatoryna qamaldy. Uıymdastyrýshyǵa qatysty qylmystyq is qozǵaldy. Qazirgi ýaqytta quqyqqa qaıshy áreketke qatysy bar basqa tulǵalardy anyqtaý jáne ustaý boıynsha sharalar júrgizilip jatyr.

Bul operatsııa azamattardyń densaýlyǵy men qaýipsizdigin qorǵaýǵa baǵyttalǵan ishki ister organdarynyń júıeli jumysynyń bir bóligi ekeni atap ótildi.

Aıta keteıik, Jambylda etıl spırtin zańsyz óndirgen uıymdasqan qylmystyq top ustaldy.