Jambyl oblysynda cý qoımalary aerosholý arqyly zerdelendi
TARAZ. KAZINFORM – Elimizdiń birneshe óńirindegi sý tasqyny ózge de óńirlerdiń etek-jeńin jıyp, jaǵdaıdy tez arada baqylaýǵa alýdy qajet etip otyr. Osy oraıda Jambyl oblysynda da oblys ákimi Erbol Qarashókeev bastaǵan top óńirdiń basty sý arterııasy – Talas ózeniniń jaǵalaýyn nyǵaıtý jumystarymen tanysty.
Jambyl oblysy boıynsha Tótenshe jaǵdaılar departamentiniń bergen málimetine súıensek, qazirgi tańda Tasótkel – 90, Teris-Ashybulaq – 85, Yntaly – 88, Aqkól – 20, Qaraqońyz – 99, Búrkitti – 29, Qaqpatas – 58, Shoń-Qaqpa (Kırovskoe) sý qoımasy – 77 paıyz sýǵa tolǵan.
Taraz qalasy men Baızaq, Jambyl aýdandaryndaǵy birqatar eldi mekender ózenge jaqyn ornalasqan. Buǵan deıin uzyndyǵy 28 shaqyrymǵa jýyq jaǵalaý bóliginde nyǵaıtý jumystary júrgizilgen bolatyn. Endigi kezekte atalǵan jumysty basqa baǵyttar boıynsha jalǵastyrý tıisti quzyrly oryndarǵa tapsyrylǵan.
«Sý basý qaýpi bar eldi mekenderde 1790 shaqyrym kanaldar, 1833 shaqyrym aryqtar, 437 shaqyrym sý burý júıeleri, 946 sý ótkizgish qubyrlar tazartylǵan. Búgingi tańda 42 eldi mekenniń 34-inde sý basý qaýpi joıylyp, 2 eldi mekenniń qaýip-qateri barynsha azaıtyldy, qalǵan 6 eldi mekende jumystar jalǵasyp jatyr. Barlyq sý qoımasy bekitilgen erejelerge sáıkes jumys isteıdi. Tasqyn sýyn qabyldaýǵa arnalǵan tegin konteınerler bar. Sondyqtan oblystaǵy azamattyq qorǵaý organdary joǵary daıyndyq rejımine kóshti. Táýlik boıy kezekshilik uıymdastyrylyp, taýly aımaqtar tikushaqpen baqylanady. Sý tasqyny jaǵdaıynyń aldyn alý maqsatynda 1459 adam, 364 tehnıka, 135 sý aıdaý qondyrǵysy, 19 júzý tehnıkasy daıyndaldy», – dedi oblys ákimi Erbol Qarashókeev Facebook áleýmettik jelisindegi jazbasynda.
Sonymen qatar oblystyq Tótenshe jaǵdaılar departamenti Jambyl oblysynyń Talas Alataýy, Qyrǵyz jotalarynyń soltústik betkeıindegi morenalyq kólderdiń jaǵdaıyn jáne bıik taýly, orta taýly aýmaqtardaǵy qar qoryn baǵalaý maqsatynda Jýaly, Merki jáne T.Rysqulov aýdandarynyń taýly aımaqtaryna aerosholý zerdeleý jumystaryn júrgizdi. Zerdeleý jumystary QR TJM «Qazavıaqutqarý» MI-8 tikushaǵymen 600-den 4000 metr bıiktikte júrgizildi.
«Talas Alataý boıynsha Jýaly aýdanynyń taýly aımaqtarynda – Kóksaı, Aqsaı, Topshaq, Tekeqamal, Qaralma shatqaldarynda qar jelisi 1600 metr absolıýttik bıiktikten bastalady. Orta taýly, bıik taýly aımaqtarda qar jamylǵysynyń bıiktigi shamamen 28-35 sm., morenalyq kólder qysqy rejımde, ıaǵnı kól aınasy muzben, qarmen jabylǵan. Taýly aımaqtyń tik eńisterinde qar kóshkini júrgen belgileri, qar jamylǵysynyń qarqyndy erýi men eńisti aǵyn baıqalmaıdy. Ózen arnalary muzsyz.
Qyrǵyz jotasy boıynsha Aspara, Áýlıeshoqy, Merki shatqaldarynda qar jamylǵysy 15-20 sm. Shatqaldardyń joǵarǵy bóliginde 2800 metr bıiktikten qar jamylǵysynyń jelisi bastalady. Qardyń jeldep jaýý saldarynan shatqaldardyń soltústiginde, jartasty betkeılerinde qar jamylǵysy bolmashy, al ońtústik betkeıler qarmen jalpylaı jabylǵan.
Taýly aımaqtyń tik eńisterinde qar kóshkini júrgen belgileri joq. Maqpal, Kishi Kókdónen, Qaraýylshoqy, Qaratastóbe, Molaly-Aırandy, Qaraqystaq, Shaltaýdyń joǵary bóliginde 3250 metr bıiktikte qar jamylǵysynyń bıiktigi shamamen 25-30 sm. Taýly aımaqtyń tik eńisterinde kóshkin júrgen belgileri joq.
T.Rysqulov aýdanyndaǵy sel qaýipti «Maqpal», «Shónger», «Qaraqat», «Qaraqystaq» «Shalsý» jáne «Kókdónen» ózenderiniń joǵarǵy bóliginde muzdaný qubylystary baıqalmaıdy. Al ózenderdiń orta jáne tómengi bóliginde jaǵalyq muz joq. Ózen alabynyń orta jáne tómengi bóliginde muz keptelisteri, qapsyrmalar baıqalmady», - delingen departament taratqan aqparatta.
