Jambyl oblysynda bıýrokratııa saldarynan iri balyq sharýashylyǵy jobasy turalap qaldy
ASTANA. KAZINFORM — Jambyl oblysynda aýyldyq okrýg ákimdiginiń zańsyz áreketteri saldarynan iri balyq sharýashylyǵy jobasy ýaqytynda iske qosa almaǵan. Bul týraly Bas prokýratýra jazdy.
— Jergilikti bılik kásiporynǵa elektr jelisine qosylýǵa negizsiz bas tartyp, perspektıvaly ınvestıtsııalyq jobanyń júzege asýyn tejegen. Nátıjesinde kásipkerlik bastamany bıýrokratııalyq kedergilerden shyǵarý úshin qadaǵalaýshy organdardyń aralasýyna týra keldi, — dep habarlady prokýratýradan.
«Adel» sharýa qojalyǵy Baızaq aýdanynda jylyna 30 tonnaǵa deıin balyq ósirýge baǵyttalǵan aýqymdy jobany iske asyrýdy josparlaǵan. Bul joba óńirdi sapaly ónimmen qamtamasyz etip qana qoımaı, aýyl turǵyndary úshin jańa jumys oryndaryn ashýǵa múmkindik bermek edi.
— Alaıda joba daıyndyq kezeńinde toqtap qaldy. Óndiristi bastaý úshin ınvestor Qostóbe aýyldyq okrýgi ákimdigine elektr jelisin tartý jáne transformatorǵa qosý týraly resmı ótinish jasaǵan. Biraq atqarýshy organ bul ótinishke zańsyz túrde bas tartqan, — delingen vedomstvonyń habarlamasynda.
Sonyń saldarynan mańyzdy jobanyń iske asý merzimi negizsiz sozylyp, kásipker qarjylyq táýekelderge tap boldy, al kásiporyn is júzinde toqtap turdy.
Másele tek Baızaq aýdany prokýratýrasynyń, sondaı-aq QR Bas prokýratýrasynyń Investorlardyń quqyqtaryn qorǵaý komıtetiniń aralasýynan keıin ǵana sheshildi.
Prokýratýra tarapynan tıisti sharalar qabyldanyp, sonyń nátıjesinde qysqa merzim ishinde nysanǵa elektr jelisi tartylyp, ınvestor jelige qosylý múmkindigine ıe boldy.
Qadaǵalaýshy organnyń málimetinshe, zań buzýshylyqqa jol berip, kásipkerlikke jasandy kedergi keltirgeni úshin ákimdik qyzmetkeri tártiptik jaýapkershilikke tartyldy. Qazirgi ýaqytta ınvestordyń quqyqtary tolyq qalpyna keltirildi.
Aıta keteıik, buǵan deıin Aqmola oblysynda 1,6 mlrd teńgeniń tıimsiz jumsalýyna jol berilmegeni habarlanǵan bolatyn. Sondaı-aq Almaty metrosynyń qurylysyna bólingen 127 mln teńge memleketke qaıtaryldy.
Eske sala keteıik, buǵan deıin Astana prokýratýrasy ınvestorlarǵa qatysty 30-dan astam zańsyz sheshimdi toqtatqanyn jazdyq.
