Jambyl oblysynda birneshe júk kóligi ıelerinen para alǵan sheneýnik sottaldy

ASTANA. KAZINFORM – Bıylǵy 20 naýryzda Taraz qalasynyń soty Jambyl oblysy boıynsha Kóliktik baqylaý ınspektsııasy basshysynyń m.a. D. Kemelovqa qatysty úkim shyǵardy.

QR Sybaılas jemqorlyqqa qarsy is-qımyl agenttiginiń habarlaýynsha, sheneýnik júk avtomashınalarynyń ıeleri men júrgizýshileri M. Mamyrovtan, N. Abdýllaevtan jáne E. Qanatovtan oblys aýmaǵy boıynsha kedergisiz júrip-turǵany úshin 100 myńnan 450 myń teńgege deıin birneshe ret para alǵany úshin kináli dep tanyldy.

Mamyrov para berýmen qatar, Abdýllaev pen Qanatovtan Kemelovtyń para alýyna deldal bolǵan.

Kemelov 6 jylǵa, Mamyrov 3 jylǵa bas bostandyǵynan aıyryldy, para berýshiler Abdýllaev pen Qanatovqa árqaısysyna 5,6 mln teńge aıyppul taǵaıyndaldy.

Sottalǵandar memlekettik qyzmette jáne kvazımemlekettik mekemelerde qyzmet atqarý quqyǵynan ómir boıyna aıyryldy.

Sot aktisi zańdy kúshine engen joq.

- Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi, -delingen habarlamada.

Osyǵan deıin qazaqstandyqtardyń jemqorlyq týraly habarlaǵany úshin 15,7 mln teńgege deıin syıaqy ala alatyny týraly jazdyq.